പയ്യന്നൂര് : അപകടത്തില്പെട്ട കാറില് നിന്ന് മാരക മയക്കുമരുന്നായ എം.ഡി.എം.എ പിടികൂടി. സംഭവത്തില് യുവാവിനെ പയ്യന്നൂര് പോലീസ് അറസ്റ്റ് ചെയ്തു. ഏഴോം നെരുവമ്പ്രം, ചെങ്ങല്തടത്തെ പി.വി. മുഹമ്മദ് ജിഷാനാണ് (32) പിടിയിലായത്. ഇയാള് സഞ്ചരിച്ച കെ.എല് 13 എ.ഇ 6723 നമ്പര് കാറില് നിന്നാണ് രണ്ടു ഗ്രാം എം.ഡി.എം.എ മയക്കുമരുന്ന് പിടികൂടിയത്.
കാറിന്റെ സ്റ്റിയറിങ്ങിനടുത്ത് പ്രത്യേകം ഉണ്ടാക്കിയ ബോക്സിലാണ് മയക്കുമരുന്ന് ഒളിപ്പിച്ചുവെച്ചിരുന്നത്. മയക്കുമരുന്ന് ഉപയോഗിക്കാനുള്ള ബര്ണര്, ലൈറ്റര്, സ്ട്രോ എന്നിവയും അതിനകത്തുനിന്ന് കണ്ടെടുത്തു. ബുധനാഴ്ച പെരുമ്പയില് മുഹമ്മദ് ജിഷാന് ഓടിച്ച കാറും മറ്റൊരു കാറും കൂട്ടിമുട്ടി അപകടമുണ്ടായിരുന്നു. ഇതേ തുടര്ന്നാണ് ഇരു വാഹനങ്ങളും പോലീസ് കസ്റ്റഡിയിലെടുത്ത് സ്റ്റേഷന് കോമ്പൗണ്ടില് എത്തിച്ചത്. പിന്നീട് ജിഷാനോട് കാറിന്റെ രേഖകള് ഹാജരാക്കാന് പോലീസ് ആവശ്യപ്പെട്ടു.
എന്നാല്, രേഖകള് കൊണ്ടുവരാത്തതിനാല് ഈ വാഹനം മോഷണമുതലോ മറ്റോ ആണെന്ന സംശയം ഉയര്ന്നതിനെ തുടര്ന്ന് പയ്യന്നൂര് പോലീസ് വാഹനം പരിശോധിച്ചപ്പോഴാണ് മയക്കുമരുന്ന് കണ്ടെത്തിയത്. മുഹമ്മദ് ജിഷാന് നേരത്തേയും മയക്കുമരുന്ന് കേസില് പ്രതിയായിരുന്നുവെന്ന് പോലീസ് പറഞ്ഞു. കഴിഞ്ഞ വര്ഷം സെപ്റ്റംബര് 18ന് എട്ടിക്കുളത്തുവെച്ച് കഞ്ചാവുമായി പയ്യന്നൂര് എക്സൈസ് ഇയാളെ അറസ്റ്റ് ചെയ്തിരുന്നു.
