കോഴിക്കോട്: ക്ഷേത്ര നടത്തിപ്പ് ചെലവിലേക്ക് എല്ലാ പോലീസ് ഉദ്യോഗസ്ഥരും ശമ്പളത്തില്നിന്ന് സംഭാവന നല്കണമെന്ന ജില്ല പോലീസ് മേധാവിയുടെ സര്ക്കുലര് വിവാദത്തില്. പണം നല്കാന് താല്പര്യമില്ലാത്തവരുടെ വിവരങ്ങള് ജൂലൈ 24നകം ജില്ല പോലീസ് ഓഫീസില് അറിയിക്കണമെന്ന നിര്ദേശമാണ് അമര്ഷത്തിനിടയാക്കിയത്. പോലീസ് നിയന്ത്രണത്തിലുള്ള കോഴിക്കോട് മുതലക്കുളം ശ്രീ ഭദ്രകാളി ക്ഷേത്രത്തിനായി 20 രൂപ വീതം മാസം തോറും നല്കണമെന്നാണ് സര്ക്കുലറില് പറയുന്നത്.
പണം പിരിക്കുന്ന രീതിക്കെതിരെ പോലീസില് തന്നെ അതൃപ്തിയുയര്ന്നിട്ടുണ്ട്. പണം നല്കാന് താല്പര്യമുള്ളവരുടെ വിവരം ശേഖരിച്ചാല് പോരേയെന്നാണ് ഒരുവിഭാഗം ചോദിക്കുന്നത്. സംഭാവന നല്കാത്തവരുടെ വിവരങ്ങള് വാങ്ങി സേനക്കുള്ളില് ബോധപൂര്വം വിഭാഗീയത സൃഷ്ടിക്കുകയാണെന്നും ആക്ഷേപമുണ്ട്. ക്ഷേത്രം മലബാര് ദേവസ്വം ബോര്ഡിന് കൈമാറി നടത്തിപ്പ് ചുമതലയില്നിന്ന് പോലീസ് പിന്മാറണമെന്ന അഭിപ്രായവും ശക്തമാണ്. നേരത്തെ പോലീസുകാരുടെ ശമ്പളത്തില്നിന്ന് പണം പിരിച്ചിരുന്നെങ്കിലും വിവാദമായതിനെ തുടര്ന്ന് നിര്ത്തിവെച്ചിരുന്നു. ഇതിനിടെയാണ് വീണ്ടും സര്ക്കുലര് ഇറക്കിയത്.
