തലശേരി: തനിക്കും ഭര്ത്താവിനും നേരെ സദാചാര അക്രമണം നടത്തിയെന്ന ഗുരുതര ആരോപണവുമായി തലശേരി ടൗണ് പോലീസിനെതിരെ യുവതി. രാത്രിയില് കടലോര വാക്ക് വേയില് ഇരിക്കുകയായിരുന്ന തങ്ങള്ക്കു നേരെ സദാചാര സംരക്ഷകര് ചമഞ്ഞ് പോലീസ് മര്ദ്ദിച്ചെന്നും തുടര്ന്ന് അറസ്റ്റ് ചെയ്തുവെന്നുമാണ് മുഖ്യമന്ത്രി, ഡി.ജി.പി , കണ്ണൂര് സിറ്റി പോലിസ് കമ്മീഷണര് എന്നിവര്ക്ക് പരാതി നല്കിയത്. എരുവട്ടി സ്വദേശികളായ യുവദമ്പതിമാരായ മേഘ, പ്രത്യൂഷ് എന്നിവര്ക്കാണ് പോലീസില് നിന്ന് മോശം അനുഭവം ഉണ്ടായത്. രാത്രി കടല് പാലം കാണാന് പോയതിന് പിന്നാലെ പോലീസില് നിന്ന് ദുരനുഭവം ഉണ്ടായെന്നാണ് പരാതി.
പോലീസില് നിന്ന് മോശം പെരുമാറ്റമുണ്ടായപ്പോള് തിരികെ ചോദ്യങ്ങള് ചോദിച്ചു. പിന്നാലെ പോലീസ് അസഭ്യവര്ഷം നടത്തി. സ്റ്റേഷനിലേക്ക് വലിച്ചിഴച്ച് കൊണ്ടുപോയി ഭര്ത്താവിനെ മര്ദിച്ചെന്നും മേഘ പറഞ്ഞു. ഭര്ത്താവിനെ സ്റ്റേഷനില് കെട്ടിത്തൂക്കും എന്ന് ഭീഷണിപ്പെടുത്തി. രാത്രി മുഴുവന് പോലീസ് സ്റ്റേഷന് പുറത്ത് നിര്ത്തിയെന്നും മേഘ പറഞ്ഞു. പോലീസിനെ ആക്രമിച്ചെന്നും ഔദ്യോഗിക കൃത്യനിര്വഹണം തടസ്സപ്പെടുത്തിയെന്നും ആരോപിച്ച് രണ്ട് പേര്ക്കെതിരെയും കേസെടുത്തു.
പോലീസിനെ ആക്രമിച്ചെന്ന കേസില് പ്രത്യുഷിനെ റിമാന്ഡ് ചെയ്തിട്ടുണ്ട്. സംഭവം വിവാദമായതിനെ തുടര്ന്ന് തലശേരി എസ്. ഐ, സി. ഐ എന്നിവര്ക്കെതിരെ വകുപ്പ് തല അന്വേഷണമാരംഭിച്ചിട്ടുണ്ട്. തലശേരി എ.സി.പി വിഷ്ണു പ്രദീപാണ് പരാതി അന്വേഷിക്കുന്നത്. സംഭവം സോഷ്യല് മീഡിയയിലും മാധ്യമങ്ങളിലും വിവാദമായതിനെ തുടര്ന്നാണ് കണ്ണൂര് സിറ്റി പോലീസ് കമ്മീഷണര് അന്വേഷണം പ്രഖ്യാപിച്ചത്.