തൃശൂര് : സോഷ്യല് മീഡിയയില് സര്ക്കാരിനും സി.പി.എമ്മിനുമെതിരേ അപകീര്ത്തികരമായ സന്ദേശങ്ങള് പ്രചരിപ്പിച്ചെന്നാരോപിച്ചു പോലീസ് ഉദ്യോഗസ്ഥനു സസ്പെന്ഷന്. തൃശൂര് സിറ്റി ജില്ലാ ഹെഡ്ക്വാര്ട്ടേഴ്സിലെ ഗ്രേഡ് എസ്ഐ. കെ.ജി ശിവശങ്കരനെയാണ് അന്വേഷണ വിധേയമായി തൃശൂര് മേഖലാ ഡി.ഐ.ജി എ.അക്ബര് സസ്പെന്ഡ് ചെയ്തത്.
നേരത്തേ സിറ്റി പോലീസ് മേധാവിയുടെ നേതൃത്വത്തില് അന്വേഷണം നടത്തി റിപ്പോര്ട്ട് നല്കിയിരുന്നു. വിശദമായ പരിശോധനയില് സര്ക്കാരിനും സി.പി.എമ്മിനുമെതിരേ അവമതിപ്പുണ്ടാക്കുന്ന സന്ദേശങ്ങള് പ്രചരിപ്പിച്ചെന്നു കണ്ടെത്തി. സംഭവത്തെക്കുറിച്ചു വിശദമായ അന്വേഷണം നടത്താന് തൃശൂര് സിറ്റി ക്രൈം ബ്രാഞ്ച് അസി.പോലീസ് കമ്മിഷണറെ ചുമതലപ്പെടുത്തി. രണ്ടുമാസത്തിനകം റിപ്പോര്ട്ട് നല്കണമെന്നാണ് ഡി.ഐ.ജിയുടെ നിര്ദ്ദേശം.
