കൊച്ചി : ഇലന്തൂര് നരബലിക്കേസിലെ മുഖ്യപ്രതി ഷാഫി ഉപയോഗിച്ചിരുന്ന രണ്ട് വ്യാജ ഫെയ്സ്ബുക്ക് അക്കൗണ്ടുകള് പോലീസ് വീണ്ടെടുത്തു. ‘സജ്നമോള്’, ‘ശ്രീജ’ എന്നീ പേരുകളില് നിര്മിച്ച വ്യാജ അക്കൗണ്ടുകളാണ് വീണ്ടെടുത്തത്. ഇതിലെ ചാറ്റ് വിവരങ്ങളും പോലീസിന് ലഭിച്ചിട്ടുണ്ട്. ഭഗവല്സിങ്ങുമായി അടുപ്പം സ്ഥാപിച്ച ‘ശ്രീദേവി’ എന്ന അക്കൗണ്ട് ഉള്പ്പെടെ ആകെ നാല് ഫെയ്സ്ബുക്ക് അക്കൗണ്ടുകളാണ് പോലീസ് കണ്ടെത്തിയത്. ഇതില് മൂന്നെണ്ണത്തിന്റെ വിവരങ്ങളാണ് ഇപ്പോള് വീണ്ടെടുത്തിരിക്കുന്നത്. ഇനി ഒരു അക്കൗണ്ടിന്റെ വിശദാംശങ്ങള് കൂടി വീണ്ടെടുക്കാനുണ്ട്. ഇതിന്റെ വിവരങ്ങളും ഫെയ്സ്ബുക്ക് അധികൃതര് വൈകാതെ പോലീസിന് കൈമാറുമെന്നാണ് സൂചന.
