നാദാപുരം: നിയമലംഘനത്തിന് നടപടി നേരിട്ട പോലീസ് വാഹനം നാദാപുരം കണ്ട്രോള് റൂമില്. വടകര റൂറല് പരിധിയിലെ നാദാപുരം പോലീസ് സ്റ്റേഷന് കണ്ട്രോള് റൂമിലാണ് തിരുവനന്തപുരം, കണ്ടന്നൂര് ആര്.ടി ഓഫിസില് ബ്ലാക്ക് ലിസ്റ്റില്പെട്ട വാഹനം ഓടുന്നത്. അമിതവേഗത്തിന് 2014 മുതല് ഈ വാഹനം ആര്.ടി.ഒ.യുടെ കരിമ്പട്ടികയിലാണെന്നാണ് ആര്.ടി.ഒ യുടെ ആപ്പായ എം. പരിവാര് രേഖകളില് ഉള്ളത്. നാദാപുരം പോലീസ് സേറ്റഷനില് ഉപയോഗത്തിലുള്ള പല വാഹനങ്ങളും ഏറെ പഴക്കംചെന്നവയാണ്. ഇതിനിടയിലാണ് ഈ വാഹനവും നാദാപുരത്തെത്തിയിരിക്കുന്നത്. വൈപ്പര്, സൈഡ് ഗ്ലാസുകള് ഇല്ലാത്തത്, തേഞ്ഞുതീരാറായ ടയര്, ബാറ്ററി പ്രശ്നം, തള്ളി നീക്കേണ്ടത് എന്നിങ്ങനെ ഇവിടെയുള്ള വാഹനങ്ങളധികവും പരാധീനതകള് നിറഞ്ഞതാണ്.
ഇത്തരം വാഹനങ്ങള് ഉപയോഗിച്ചാണ് നാദാപുരത്ത് പോലീസിന്റെ പ്രവര്ത്തനം. വാഹന പരിശോധനക്കിറങ്ങുന്ന വാഹനങ്ങളില് പലതും മോട്ടോര് വകുപ്പിന്റെ നിബന്ധനകള് പാലിക്കുന്നില്ലെന്ന് കാണിച്ച് അരൂരിലെ ഒരു ഓട്ടോ ഡ്രൈവര് വാഹനത്തിന്റെ രേഖകള് സഹിതം സമൂഹ മാധ്യമത്തില് കുറിപ്പ് ഇറക്കിയതോടെയാണ് പോലീസ് വാഹനങ്ങളുടെ നിയമലംഘനങ്ങളും ചര്ച്ചയായത്.
വാഹന പരിശോധനയുടെ പേരില് പോലീസ് ഉദ്യോഗസ്ഥര്തന്നെ നിയമലംഘനം നടത്തുന്നതായും നാട്ടുകാര് പരാതിപ്പെടുന്നു. പലസ്ഥലത്തും അപകട വളവിലും മറ്റും നിര്ത്തിയിട്ടാണ് പോലീസ് വാഹന പരിശോധന നടത്തുന്നതെന്നും വളവും വീതി കുറഞ്ഞതുമായ റോഡില് പോലീസ് വാഹനം നിര്ത്തിയിടുന്നതുകൊണ്ട് മറ്റ് വാഹനങ്ങള്ക്ക് കടന്നുപോകാന് പ്രയാസം സൃഷ്ടിക്കുകയും അപകടത്തിനിടയാക്കുകയും ചെയ്യുന്നതായും നാട്ടുകാര് പറയുന്നു.
