കൊച്ചി : കാലടി ശ്രീശങ്കരാചാര്യ സംസ്കൃത സര്വകലാശാലയില് ചട്ടങ്ങള് ലംഘിച്ച് അധ്യാപക നിയമനങ്ങള് നടത്തിയെന്ന് ആരോപിച്ച് യുവജന സംഘടനകളുടെ പ്രതിഷേധം. കെ.എസ്.യു പ്രവര്ത്തകരാണ് സര്വകലാശാലയിലേക്ക് ആദ്യം മാര്ച്ച് നടത്തിയത്. പ്രധാന കവാടത്തിന് മുന്നില് പോലീസ് തടഞ്ഞതിനെത്തുടര്ന്ന് പ്രവര്ത്തകര് കുത്തിയിരുന്ന് പ്രതിഷേധിച്ചു.
യൂത്ത് കോണ്ഗ്രസ് സംസ്ഥാന ജനറല് സെക്രട്ടറിയും മുന് സിന്ഡിക്കേറ്റ് അംഗവുമായ ലിന്റോ പി. ആന്റ് മാര്ച്ച് ഉദ്ഘാടനം ചെയ്തു. ഇവര് പിരിഞ്ഞതോടെ ബി.ജെ.പി, യുവമോര്ച്ച പ്രവര്ത്തകര് പ്രതിഷേധവുമായെത്തി. ഇവരെ പോലീസ് തടഞ്ഞതോടെ ചെറിയതോതില് ഉന്തും തള്ളുമുണ്ടായി. യുവമോര്ച്ച മാര്ച്ച് സംസ്ഥാന സെക്രട്ടറി ദിനില് ദിനേശ് ഉദ്ഘാടനം ചെയ്തു. മണ്ഡലം പ്രസിഡന്റ് അജേഷ് പാറയ്ക്കല് അധ്യക്ഷത വഹിച്ചു. യുവമോര്ച്ച സമരത്തിനിടെ യൂത്ത് കോണ്ഗ്രസ് പ്രവര്ത്തകര് പ്രതിഷേധവുമായെത്തിയത് പോലീസിന് തലവേദനയായി.
യൂത്ത് കോണ്ഗ്രസ് പ്രവര്ത്തകരെ മറ്റൊരു ഭാഗത്ത് തടഞ്ഞുനിര്ത്തിയെങ്കിലും പോലീസിനെ തള്ളിനീക്കി പ്രവര്ത്തകര് മതില് ചാടിക്കടന്ന് അകത്ത് പ്രവേശിച്ചു. കോടനാട് സി.ഐ സജി മാര്ക്കോസിന്റെ നേതൃത്വത്തില് ബലപ്രയോഗത്തില് കീഴ്പ്പെടുത്തിയതോടെ പ്രവര്ത്തകര് നിലത്തുകിടന്ന് മുദ്രാവാക്യം വിളിച്ചു. ഇരുഗേറ്റും പോലീസ് പൂട്ടിയതിനെത്തുടര്ന്ന് മതില് ചാടിക്കടന്ന് വന്നാണ് റോജി എം. ജോണ് എം.എല്.എ സമരം ഉദ്ഘാടനം ചെയ്തത്. സി.പി.എം അനുഭാവികളെ തിരുകിക്കയറ്റാനുള്ള അജണ്ടയുടെ ഭാഗമാണ് അനധികൃത നിയമനങ്ങളെന്ന് അദ്ദേഹം ആരോപിച്ചു. മണ്ഡലം പ്രസിഡന്റ് നിതിന് മംഗലി അധ്യക്ഷത വഹിച്ചു.
