ആലപ്പുഴ : ആലപ്പുഴയില് ശനിയാഴ്ച നടന്ന പോപ്പുലര് ഫ്രണ്ട് റാലിയില് കുട്ടി പ്രകോപനപരമായ മുദ്രാവാക്യം വിളിച്ച സംഭവത്തില് പോലീസ് അന്വേഷണം.രഹസ്യാന്വേഷണ വിഭാഗമാണ് അന്വേഷണം നടത്തുന്നത്. കേന്ദ്ര ഏജന്സിയും ഇത് പരിശോധിക്കുന്നുണ്ടെന്നാണ് സൂചന. കുട്ടി വിളിച്ചത് സംഘാടകര് നല്കിയ മുദ്രാവാക്യമല്ലെന്നാണ് പോപ്പുലര് ഫ്രണ്ടിന്റെ നിലപാട്. സംഭവം ശ്രദ്ധയില്പെട്ടുവെന്നും തിരുത്തല് നടപടി സ്വീകരിക്കുമെന്നും സംസ്ഥാന സെക്രട്ടറി സി.എ റൗഫ് പ്രതികരിച്ചു.
റാലിക്കിടെ മറ്റൊരാളുടെ ചുമലില് ഇരുന്നാണ് കുട്ടി പ്രകോപനപരമായ മുദ്രാവാക്യം വിളിച്ചത്. ഇത് മറ്റുള്ളവര് ഏറ്റുവിളിക്കുകയും ചെയ്തിരുന്നു. 10 വയസ്സ് പോലും തോന്നിക്കാത്ത കുട്ടിയില് നിന്ന് ഇത്തരമൊരു മുദ്രാവക്യം ഉയര്ന്നത് എല്ലാവരേയും ഞെട്ടിച്ചിരുന്നു. മതവിദ്വേഷം ഉണ്ടാക്കുന്ന വിധത്തിലായിരുന്നു മുദ്രാവാക്യം. സമൂഹ മാധ്യമങ്ങളിലൂടെ ഇത് വലിയ തോതില് പ്രചരിച്ചിരുന്നു.
