കൊച്ചി; സോഷ്യല് ഡെമോക്രാറ്റിക് പാര്ട്ടി ഓഫ് ഇന്ത്യ, പോപ്പുലര് ഫ്രണ്ട് ഓഫ് ഇന്ത്യ, എന്നിവ തീവ്ര സംഘടനകളാണെന്ന കാര്യത്തില് സംശയമില്ലെന്ന് കേരളാ ഹൈക്കോടതി. പാലക്കാട്ടെ ആര്എസ്എസ് പ്രവര്ത്തകന് സഞ്ജിത്തിന്റെ കൊലപാതകത്തില് സിബിഐ അന്വേഷണം ആവശ്യപ്പെട്ടു കൊണ്ടുള്ള ഹര്ജിയില് വാദം കേള്ക്കുകയായിരുന്നു കോടതി. സഞ്ജിത്തിന്റെ ഭാര്യ എസ് അര്ഷിക സമര്പ്പിച്ച ഹര്ജി ഹൈക്കോടതി തള്ളി. തീവ്ര സംഘടനകള് ആണെങ്കിലും ഇവ നിരോധിക്കപ്പെട്ടിട്ടില്ലെന്ന കാര്യവും കോടതി ചൂണ്ടിക്കാട്ടി.
സഞ്ജിത്തിന്റെ കൊലപാതകവുമായി ബന്ധപ്പെട്ട പ്രതികള് എസ്ഡിപിഐ പ്രവര്ത്തകരാണെന്ന് പോലീസ് കണ്ടെത്തിയിരുന്നു. എസ്ഡിപിഐ പ്രവര്ത്തകനെ ആക്രമിച്ചതിനുള്ള പ്രതികാരമായാണ് സഞ്ജിത്തിനെ കൊന്നത്. പ്രതികള് നടത്തിയ ഗൂഢാലോചന പുറത്തു വന്നെന്നും കൊലപാതകികളെ തിരിച്ചറിഞ്ഞെന്നും പോലീസ് വ്യക്തമാക്കി. കേസിലെ മുഖ്യ പ്രതികളെ പിടികൂടിയതായി കോടതി അറിയിച്ചു. നിശ്ചിത കാലയളവിനുള്ളില് അന്തിമ റിപ്പോര്ട്ട് ഹാജരാക്കിയതിനാല് പ്രതികള്ക്ക് ജാമ്യവും ലഭിച്ചിരുന്നില്ല. ഈ സാഹചര്യത്തില് കുറ്റവാളികളെ സംരക്ഷിക്കുന്നതില് അന്വേഷണ ഏജന്സിക്ക് പ്രത്യേക താല്പര്യമുണ്ടെന്ന് തോന്നുന്നില്ലെന്നും കോടതി പറഞ്ഞു.
