ന്യൂഡല്ഹി : എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്ത മൂന്ന് പോപ്പുലർ ഫ്രണ്ട് നേതാക്കളെ ഡൽഹി പ്രത്യേക കോടതി ഏഴ് ദിവസം കസ്റ്റഡിയിൽ വിട്ടു. പോപ്പുലര് ഫ്രണ്ട് ഡൽഹി പ്രസിഡന്റ് പർവീസ് അഹമ്മദ്, ജനറൽ സെക്രട്ടറി എം.ഡി ഇല്യാസ്, ഓഫീസ് സെക്രട്ടറി അബ്ദുൽ മുഖീത് എന്നിവരെയാണ് കസ്റ്റഡിയിൽ വിട്ടത്. കേരളത്തിൽ നിന്ന് അറസ്റ്റ് ചെയ്ത ഷെഫീഖ് പിയെ അടുത്ത മാസം മൂന്ന് വരെ ലഖ്നൗ കോടതി കസ്റ്റഡിയിൽ വിട്ടു. ലഖ്നൗ ജയിലിലാണ് ഷെഫീഖ് പി നിലവിലുള്ളത്.
കൊച്ചിയിൽ അറസ്റ്റ് ചെയ്ത പോപ്പുലർ ഫ്രണ്ട് പ്രവർത്തകരെ ഏഴ് ദിവസത്തെ എൻ.ഐ.എ കസ്റ്റഡിയിൽ വിട്ടു. കൊച്ചി എൻ.ഐ.എ കോടതിയുടേതാണ് നടപടി. രാജ്യവിരുദ്ധ പ്രവർത്തനങ്ങളുടെ പേരിൽ അറസ്റ്റിലായ കരമന അഷ്റഫ് മൗലവി അടക്കമുള്ള 11 പോപ്പുലർ ഫ്രണ്ട് പ്രവർത്തകരെയാണ് കസ്റ്റഡിയിൽ വിട്ടത്. കേരളത്തിലെ പ്രമുഖരെ അടക്കം കൊലപ്പെടുത്താൻ പോപ്പുലർ ഫ്രണ്ട് ലക്ഷ്യമിട്ടെന്നും ഗൂഢാലോചന സംബന്ധിച്ച കൂടുതൽ വിശദാംശങ്ങൾ ലഭിക്കാൻ കസ്റ്റഡിയിൽ വേണമെന്നും എൻ.ഐ.എ ആവശ്യപ്പെട്ടിരുന്നു.
