തിരുവനന്തപുരം : പോത്തന്കോട് സുധീഷ് വധക്കേസില് പോലീസ് കുറ്റപത്രം സമര്പ്പിച്ചു. കുപ്രസിദ്ധ ഗുണ്ടാ നേതാവ് ഒട്ടകം രാജേഷ് അടക്കം പതിനൊന്ന് പ്രതികളാണ് കേസിലുള്ളത്. ഗുണ്ടാ സംഘങ്ങള് തമ്മിലുള്ള വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് കുറ്റപത്രത്തില് പോലീസ് വ്യക്തമാക്കുന്നത്. ആറ്റിങ്ങല് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് കുറ്റപത്രം സമര്പ്പിച്ചത്.
കഴിഞ്ഞ ഡിസംബര് 11-ാം തീയതിയാണ് കേസിനാസ്പദമായ സംഭവം നടക്കുന്നത്. പോത്തന്കോട് കല്ലൂരില് സുധീഷ് എന്ന യുവാവിനെ ഒരു സംഘം അക്രമികള് അതിക്രൂരമായി വെട്ടിക്കൊല്ലുകയായിരുന്നു. അക്രമിസംഘത്തെ കണ്ട് ഒരു വീട്ടില് ഓടിയൊളിച്ച സുധീഷിനെ പിന്തുടര്ന്നെത്തിയ സംഘം മാരകമായി വെട്ടിപരിക്കേല്പ്പിക്കുകയായിരുന്നു. പിന്നാലെ സുധീഷിന്റെ കാലും വെട്ടിയെടുത്താണ് പ്രതികള് കടന്നുകളഞ്ഞത്.
വെട്ടിയെടുത്ത കാല് നാട്ടുകാര്ക്ക് മുന്നില് പ്രദര്ശിപ്പിച്ച് വാഹനങ്ങളില് രക്ഷപ്പെടുന്ന സിസിടിവി ദൃശ്യങ്ങളും പുറത്തുവന്നിരുന്നു. കേസില് ഒട്ടകം രാജേഷ് അടക്കമുള്ളവരാണ് പ്രതികളെന്ന് പോലീസിന് പ്രാഥമിക ഘട്ട അന്വേഷണത്തില് തന്നെ വിവരം ലഭിച്ചിരുന്നു. എന്നാല് സംഭവത്തിന് പിന്നാലെ ഒളിവില്പോയ ഒട്ടകം രാജേഷിനെ ദിവസങ്ങള്ക്ക് ശേഷമാണ് പിടികൂടാനായത്. രണ്ടാഴ്ചയെടുത്താണ് കേസിലെ 11 പ്രതികളെയും പോലീസ് പിടികൂടിയത്. ഒട്ടകം രാജേഷിനെ തിരഞ്ഞുപോയ പോലീസ് സംഘം സഞ്ചരിച്ച വള്ളം മറിഞ്ഞ് ഒരു പോലീസുകാരന് ജീവന് നഷ്ടപ്പെടുകയും ചെയ്തിരുന്നു.
