നെല്ലൂര്: അത്ഭുത ആയുര്വേദ മരുന്ന് ഉപയോഗിച്ച് കൊവിഡ് ഭേദമായെന്ന് അവകാശപ്പെട്ടയാള് ആന്ധ്രാപ്രദേശില് മരിച്ചു. അധ്യാപകനായിരുന്ന എന്. കോട്ടയ്യയാണ് നെല്ലൂര് ജനറല് ആശുപത്രിയില് മരിച്ചത്.
നെല്ലൂരിലെ കൃഷ്ണപ്പട്ടണത്തെ ബോണിഗി ആനന്ദയ്യ നിര്മ്മിച്ച ഒരു ഔഷധ മരുന്ന് കണ്ണില് ഇറ്റിച്ചെന്നും ഇതോടെ കൊവിഡില് നിന്ന് മോചിതനായെന്നും പറഞ്ഞുകൊണ്ടുള്ള കോട്ടയ്യയുടെ വീഡിയോ വൈറലായിരുന്നു. വീഡിയോ വൈറലായതിന് പിന്നാലെ ആയിരകണക്കിന് പേരാണ് കൃഷ്ണപ്പട്ടണത്ത് മരുന്നിനായി എത്തികൊണ്ടിരിക്കുന്നത്.
ഓക്സിജന്റെ അളവ് താഴ്ന്നതിനെ തുടര്ന്ന് കോട്ടയ്യയെ വെള്ളിയാഴ്ച രാത്രിയോടെയാണ് നെല്ലൂര് സര്ക്കാര് ജനറല് ആശുപത്രിയില് പ്രവേശിപ്പിച്ചത്. മറ്റു പല രോഗങ്ങളും ഉണ്ടായിരുന്നുവെന്നും തിങ്കളാഴ്ച പുലര്ച്ചയോടെയാണ് മരിച്ചതെന്ന് ആശുപത്രി സൂപ്രണ്ട് ഡോ.സുധാകര് റെഡ്ഡി അറിയിച്ചു.
