റാന്നി : ഗർഭിണിയായ പൂച്ചയെ കെട്ടി തൂക്കി ആ ദൃശ്യങ്ങൾ നവ മാധ്യമങ്ങളിലൂടെ പ്രചരിപ്പച്ചതും , സ്വന്തം വളർത്തുനായയെ ഉടമസ്ഥൻ ഓടുന്ന കാറിൻ്റെ പുറകിൽ കെട്ടിയിട്ട് കൊലപ്പെടുത്താൻ ശ്രമിച്ചതുമായ കേട്ടുകേഴ് വി യില്ലാത്ത ക്രൂരതകളുടെ ഞെട്ടലിൽ നിന്ന് കേരളീയർ മുക്തരാകുന്നതിന് മുൻപ് തന്നെ മറ്റൊരു ക്രൂരതയുടെ വാർത്തയാണ് റാന്നിയിൽ നിന്ന് പുറത്തു വരുന്നത് .
റാന്നി പൊന്നമ്പാറയിൽ സുന്ദരേശന്റെ എട്ട് മാസം ഗർഭിണിയായിരുന്ന പശുവിനെയാണ് കഴിഞ്ഞ രാത്രിയിൽ സാമുഹിക വിരുദ്ധർ മരത്തിനോട് ചേർത്ത് കഴുത്തിൽ കയർമുറുക്കി ശ്വാസം മുട്ടിച്ച് കൊലപ്പെടുത്തിയത് . കഴിഞ്ഞ ദിവസം ഈ പശു റബ്ബര് ബോര്ഡിൻ്റെ തോട്ടത്തിൽ കയറിയെന്നാരോപിച്ച് വാച്ചര് പശുവിനെ അഴിച്ച് ബി ഡിവിഷന് ഓഫീസില് എത്തിച്ചിരുന്നു.തുടർന്ന് റാന്നി പോലീസ് രാത്രിയിലെത്തി പ്രശ്നം പരിഹരിച്ച് ഉടമയ്ക്ക് പശുവിനെ കൈമാറി . തുടർന്ന് വീട്ടിലെത്തിച്ച പരുവിനെ രാത്രിയില് വീടിന് സമീപത്തെ റബ്ബര് മരത്തിലാണ് കെട്ടിയിരുന്നത് .
രാവിലെ വീട്ടുകാർ വന്നു നോക്കുമ്പോഴാണ് പശുവിനെ കൊലപ്പെടുത്തിയ നിലയിൽ കാണുന്നത് . തുടർന്ന് റാന്നി പോലീസ് സ്ഥലത്തെത്തി ഉടമയുടെ പരാതിയിൽ അന്വേഷണം ആരംഭിച്ചു . സ്ഥലത്ത് സാമുഹിക വിരുദ്ധരുടെ ശല്യം രൂക്ഷമാണെന്ന് മുൻപും പരാതി ഉയർന്നിരുന്നു . ഇവരെ കണ്ടെത്താനുള്ള ശ്രമത്തിലാണ് പോലീസ്
