പത്തനംതിട്ട :പഞ്ചായത്ത് പ്രസിഡന്റിനെ കയ്യേറ്റം ചെയ്ത സംഭവം സിപിഎം പ്രവര്‍ത്തകര്‍ അറസ്റ്റില്‍.
പുറമറ്റം പഞ്ചായത്ത് പ്രസിഡന്റ് സൗമ്യ ജോബിയെ കൈയേറ്റം ചെയ്തെന്ന പരാതിയിലാണ്അഞ്ച് സി.പി.എം പ്രവര്‍ത്തകരെ അറസ്റ്റ ചെയ്തത്.ശോഭിക, മായ, കുഞ്ഞമ്മ വിജയന്‍, പൊന്നമ്മ, ഷിജോ കുരുവിള എന്നിവരാണ് പിടിയിലായത്. സൗമ്യ കോയിപ്രം പോലീസ് സ്റ്റേഷനില്‍ നല്‍കിയ പരാതിയിലാണ് നടപടി.വെള്ളിയാഴ്ച ഉച്ചയോടെയാണ് സംഭവം. പഞ്ചായത്ത് ഓഫീസിന് മുന്നില്‍ വെച്ച്‌ ഒരു സംഘം ആളുകള്‍ വളഞ്ഞിട്ട് ആക്രമിക്കുകയായിരുന്നെന്ന് സൗമ്യ ആരോപിച്ചിരുന്നു. മുടിയില്‍ പിടിച്ച്‌ വലിക്കുകയും വസ്ത്രം വലിച്ചുകീറുകയും ചെയ്തു.
സ്ത്രീകളാണ് ആക്രമിച്ചതെന്നും സി.പി.എം പഞ്ചായത്ത് അംഗങ്ങളായ ഷിജു പി. കുരുവിള, സാബു ബഹനാന്‍ എന്നിവരാണ് ആസൂത്രകരെന്നുമായിരുന്നു ആരോപണം. എന്നാല്‍, പ്രസിഡന്റ് പഞ്ചായത്ത് ഓഫിസിലെത്തിയപ്പോള്‍ പ്രതിഷേധിക്കുക മാത്രമാണ് ചെയ്തതെന്നായിരുന്നു സി.പി.എം വിശദീകരണം.എല്‍.ഡി.എഫ് സ്വതന്ത്രയായി വിജയിച്ച സൗമ്യക്ക് ഒരു വര്‍ഷത്തെ പ്രസിഡന്റ് പദവി നല്‍കാനായിരുന്നു ധാരണ. ഇതിനുശേഷവും രാജിവെക്കാത്തതിനെ തുടര്‍ന്ന് കഴിഞ്ഞദിവസം എല്‍.ഡി.എഫ് അംഗങ്ങള്‍ തന്നെ പ്രസിഡന്‍റിനെതിരെ അവിശ്വാസപ്രമേയം കൊണ്ടുവന്നെങ്കിലും ക്വാറം തികയാത്തതിനാല്‍ ചര്‍ച്ചക്കെടുക്കാന്‍ കഴിഞ്ഞിരുന്നില്ല.
അതിനിടെ, സി.പി.എം പിന്തുണക്കുന്ന വൈസ് പ്രസിഡന്റ് ശോശാമ്മ തോമസിനെതിരെ 23ന് സൗമ്യ ജോബി, ആറ് യു.ഡി.എഫ് അംഗങ്ങള്‍ക്കൊപ്പം ചേര്‍ന്ന് അവിശ്വാസപ്രമേയ അവതരണത്തിന് നോട്ടീസ് നല്‍കിയിരുന്നു. തുടര്‍ന്ന് സംഘര്‍ഷസാധ്യത കണക്കിലെടുത്ത് പോലീസ് സംരക്ഷണം ഒരുക്കി. വ്യാഴാഴ്ച പഞ്ചായത്തിലെ ജീപ്പ് ഏതാനും പേര്‍ തകര്‍ത്തിരുന്നു. തുടര്‍ന്നാണ് വെള്ളിയാഴ്ച സൗമ്യക്കെതിരെ ആക്രമണം ഉണ്ടായത്.
കോണ്‍ഗ്രസിനൊപ്പം ചേര്‍ന്നതിനാലാണ് ആക്രമണം നടത്തിയതെന്നാണ് സൗമ്യ ആരോപിക്കുന്നത്. പോലീസ് വലയത്തിനുള്ളില്‍വെച്ചാണ് ആക്രമിച്ചതെന്നും വാച്ചും ബാഗും നഷ്ടപ്പെട്ടെന്നും ചുരിദാറിന്റെ ടോപ്പ് കീറിയെന്നും സൗമ്യ പറഞ്ഞു. സ്വതന്ത്രയായാണ് മത്സരിച്ചത്. എല്‍.ഡി.എഫ് അന്ന് പിന്തുണ നല്‍കിയിരുന്നു. ഇപ്പോള്‍ യു.ഡി.എഫിലെ ആറ് അംഗങ്ങളും പ്രസിഡന്റായി തുടരാന്‍ പിന്തുണക്കുന്നതിനാല്‍ താന്‍ രാജിവെക്കുന്ന പ്രശ്നമില്ലെന്നും അവര്‍ വ്യക്തമാക്കി.എന്നാല്‍, പാര്‍ട്ടി പ്രവര്‍ത്തകരോ വനിത അംഗങ്ങളോ പഞ്ചായത്ത് പ്രസിഡന്റിനെ കൈയേറ്റം ചെയ്തിട്ടില്ലെന്നും മുദ്രാവാക്യം വിളിക്കുക മാത്രമാണ് ഉണ്ടായതെന്നും വിശ്വാസവഞ്ചനക്കെതിരെ രാജിവെക്കുംവരെ പ്രക്ഷോഭം തുടരുമെന്നും സി.പി.എം പുറമറ്റം ലോക്കല്‍ കമ്മിറ്റി സെക്രട്ടറി അജിത് പ്രസാദ് പറഞ്ഞു.
