ഡല്ഹി: രണ്ടാം ഘട്ട കൊവിഡ് വ്യാപനം രാജ്യത്തെ ഉലച്ചുവെന്ന് പ്രധാനമന്ത്രി നരേന്ദ്രമോദി. മന്കി ബാത്തിലായിരുന്നു മോദി ഇക്കാര്യം വ്യക്തമാക്കിയത്. കൊവിഡ്-19 രൂക്ഷമായ ഈ ഘട്ടത്തില് ഓക്സിജന് ഉല്പ്പാദനം, ഫാര്മ ഇന്ഡസ്ട്രി തുടങ്ങിയ കാര്യങ്ങള് സംബന്ധിച്ച് അതത് മേഖലയിലെ വിദഗ്ധരുമായി ചര്ച്ച നടത്തിയെന്നും അദ്ദേഹം അറിയിച്ചു.
നമ്മുടെ ആരോഗ്യ വിദഗ്ധരും ഡോക്ടര്മാരും കൊവിഡിനെതിരെ പോരാടുകയാണ്. നമ്മള് ഒന്നാം തരംഗത്തെ വിജയകരമായി പൂര്ത്തീകരിച്ചു. എന്നാല് രണ്ടാം തരംഗത്തില് പ്രിയപ്പെട്ടവര് നമുക്ക് നഷ്ടമായി. വിശ്വാസ്യ യോഗ്യമായ സ്രോതസില് നിന്ന് മാത്രമെ കൊവിഡ്-19 സംബന്ധിച്ച അറിയിപ്പുകള് സ്വീകരിക്കാന് പാടുള്ളൂ. – മോദി പറഞ്ഞു.
വാക്സിനേഷന് സംബന്ധിച്ച് ഊഹാപോഹങ്ങളുടെ ഇരയാവരുതെന്നും മോദി ആവശ്യപ്പെട്ടു. എല്ലാ സംസ്ഥാന സര്ക്കാരുകള്ക്കും സൗജന്യ കൊവിഡ്-19 വാക്സിന് കേന്ദ്രം അയച്ചിട്ടുണ്ട്. 45 വയസ് കഴിഞ്ഞ എല്ലാവര്ക്കും ഇതിന്റെ ഗുണം ലഭിക്കും. മെയ് 1 മുതല് പതിനെട്ട് വയസ് കഴിഞ്ഞ എല്ലാവര്ക്കും വാക്സിന് ലഭ്യമായിരിക്കുമെന്നും പ്രധാനമന്ത്രി ഉറപ്പ് നല്കി.
