കല്ലടിക്കോട് : കോവിഡ് വ്യാപനം കൂടുകയും ആശുപത്രികളില് രോഗികള് നിറയുകയും ചെയ്യുന്ന പശ്ചാത്തലത്തില് സ്വകാര്യ ബസുകള് ആശുപത്രിയാക്കി. പള്ളിക്കുറുപ്പ് ശബരി ഹയര് സെക്കന്ഡറി സ്കൂളിന്റെയും രാജപ്രഭ മോട്ടോഴ്സിന്റെയും നാല് ബസുകളാണ് സീറ്റുകളെല്ലാം അഴിച്ചുമാറ്റി ആശുപത്രിയുടെ വാര്ഡുകളാക്കി മാറ്റിയത്. കേരളത്തില് ആദ്യമായാണ് ആശുപത്രികളിലെ പരിമിതി മറികടക്കാനും കോവിഡ് രോഗികള്ക്ക് തക്ക സമയത്ത് ചികിത്സ ഉറപ്പാക്കാനും ഈ തരത്തിലുള്ള സൗകര്യമൊരുക്കുന്നത്. പാലക്കാട് നഗരത്തിലെ വര്ക്ക്ഷോപ്പില്നിന്ന് സീറ്റുകളെല്ലാം അഴിച്ചുമാറ്റി. ഇതിനായി ബെഡുകളും ഒരുക്കി.
ഓക്സിജന് ലഭിക്കുന്ന ചെറിയ ആശുപത്രികളാണ് ബസിനകത്ത് സജ്ജീകരിക്കുന്നത്. ഓക്സിജന് സിലിണ്ടര് ഘടിപ്പിക്കുന്ന രീതിയില് കിടക്കകള് സജ്ജമാക്കിയ നാല് ബസുകളാണ് പാലക്കാട്ടുനിന്ന് കൊച്ചി കടവന്ത്രയിലെ ഇന്ദിരാ ഗാന്ധി ആശുപത്രിയില് എത്തിക്കുക. ഇവിടെ വെച്ച് ഓക്സിജന് സിലിണ്ടര് ഘടിപ്പിക്കും.
രാജപ്രഭയുടെ സര്വിസ് ബസുകളും ഇത്തരത്തില് രൂപമാറ്റം വരുത്തി കോവിഡ് പ്രതിരോധത്തിനായി വിട്ടുനല്കും. അവശനിലയില് എത്തുന്ന രോഗികളെ ആശുപത്രി മുറ്റത്ത് നിര്ത്തിയിട്ടിരിക്കുന്ന ബസുകളില് എത്തിച്ച് ഓക്സിജന് നല്കും. ഇവരെ പിന്നീട് കിടക്ക കിട്ടുന്ന മുറക്ക് ആശുപത്രിയിലേക്ക് മാറ്റാനും ഇത് ഉപകാരപ്പെടും. അതിജീവനത്തിന്റെ പുതുപരീക്ഷണം സേവന വീഥിയില് മറ്റുള്ളവര്ക്ക് കൂടി മാതൃകയാവുകയാണ്. ശബരി ചാരിറ്റബിള് ട്രസ്റ്റ് ചെയര്മാന് ശശികുമാറിന്റെ മനസ്സിലുദിച്ച ആശയം പ്രാവര്ത്തികമാക്കുന്നതില് സ്കൂളിന്റെ പൂര്ണ പിന്തുണയുണ്ട്. രാജപ്രഭ ബസുടമ രാജനും ഈ രീതി പിന്തുടരുന്നു. ഇരുവര്ക്കും കോവിഡ് ബാധിതരെ സഹായിക്കുന്നതിന് തങ്ങള്ക്കാവുന്നത് ചെയ്യാനായ ചാരിതാര്ഥ്യമുണ്ട്.
