ന്യൂഡല്ഹി: മോദി സര്ക്കാര് കൊണ്ടുവന്ന കാര്ഷിക ബില്ലുകള്ക്കെതിരെ രൂക്ഷവിമര്ശനവുമായി കോണ്ഗ്രസ് നേതാവ് പ്രിയങ്ക ഗാന്ധി. സര്ക്കാര് കോടീശ്വരന്മാരായ സുഹൃത്തുക്കള്ക്ക് വേണ്ടിയാണ് പുതിയ കാര്ഷിക ബില്ലുകള് കൊണ്ടുവന്നത്. കര്ഷകര്ക്ക് ഏറ്റവും ബുദ്ധിമുട്ടുള്ള സമയത്ത് ഉല്പന്നങ്ങള്ക്ക് താങ്ങുവില പ്രഖ്യാപിക്കുകയോ സംഭരണത്തിനായുള്ള സംവിധാനങ്ങള് ഒരുക്കി നല്കുകയോ ചെയ്യാതെ നേരരെ വിപരീതമായി കാര്ഷക ദ്രോഹനടപടികളാണ് ചെയ്യുന്നതെന്ന് പ്രിയങ്ക ട്വിറ്ററിലൂടെ പ്രതികരിച്ചു.
”ഇത് കര്ഷകര്ക്ക് ബുദ്ധിമുട്ടുള്ള സമയമാണ്. താങ്ങുവില പ്രഖ്യാപിച്ചും കര്ഷകര്ക്ക് സംഭരണ സൗകര്യങ്ങള് നല്കിയും സര്ക്കാര് അവരെ സഹായിക്കേണ്ടതായിരുന്നു. എന്നാല് നേരെ മറിച്ചാണ് സംഭവിച്ചത്. സമ്പന്നരായ സുഹൃത്തുക്കളെ കാര്ഷിക മേഖലയിലേക്ക് കൊണ്ടുവരാണ് ബി.ജെ.പി സര്ക്കാര് ഉത്സാഹം കാണിക്കുന്നത് – പ്രിയങ്ക ഗാന്ധി ട്വിറ്ററില് കുറിച്ചു.
കേന്ദ്രസര്ക്കാറിന്റെ കാര്ഷിക ബില്ലുകള്ക്കെതിരെ പഞ്ചാബ്, ഹരിയാന, തെലങ്കാന തുടങ്ങിയ സംസ്ഥാനങ്ങളില് വന് കാര്ഷിക പ്രക്ഷോഭങ്ങളാണ് നടക്കുന്നത്. മോദിസര്ക്കാര് തെന്റ ചങ്ങാതിമാരുടെ വ്യാപാരം ഉയര്ത്തുകയും കര്ഷകരുടെ ഉപജീവനമാര്ഗത്തെ ഇല്ലാതാക്കുകയുമാണ് ചെയ്യുന്നതെന്ന് കോണ്ഗ്രസ് നേതാവ് രാഹുല് ഗാന്ധിയും വിമര്ശിച്ചിരുന്നു.
കാര്ഷിക മേഖലയുമായി ബന്ധപ്പെട്ട് മൂന്നു ബില്ലുകളാണ് മോദിസര്ക്കാര് പാര്ലമെന്റില് അവതരിപ്പിച്ചത്. 2020ല് പുറത്തിറക്കിയ ദി ഫാര്മേഴ്സ് പ്രൊഡ്യൂസ് ട്രേഡ് ആന്ഡ് കൊമേഴ്സ് (പ്രമോഷന് ആന്ഡ് ഫെസിലിറ്റേഷന്) ബില്, ദി ഫാര്മേഴ്സ് (എംപവര്മെന്റ് ആന്ഡ് പ്രൊട്ടക്ഷന്) എഗ്രിമെന്റ് ഓഫ് പ്രൈസ് അഷ്വറന്സ് ആന്ഡ് ഫാം സര്വ്വീസ് ബില് എന്നിവ കേന്ദ്ര കൃഷി മന്ത്രി നരേന്ദ്ര സിങ് തോമറാണ് സഭയില് അവതരിപ്പിച്ചത്. അവശ്യവസ്തു ഭേദഗതി ബില് 2020, ഭക്ഷ്യ സഹമന്ത്രി റാവു സാഹിബ് പാട്ടീല് ദാന്വേയും അവതരിപ്പിച്ചു.
