ന്യൂഡല്ഹി : വിലക്കയറ്റത്തിനും തൊഴിലില്ലായ്മയ്ക്കുമെതിരേ കോണ്ഗ്രസ് സംഘടിപ്പിച്ച പ്രതിഷേധത്തിനിടെ രാഹുല് ഗാന്ധിയെയും പ്രിയങ്ക ഗാന്ധിയെയും ഡല്ഹി പോലീസ് അറസ്റ്റ് ചെയ്തു. കോണ്ഗ്രസ് വര്ക്കിംഗ് കമ്മിറ്റി അംഗങ്ങളും പ്രവര്ത്തകരും പ്രധാനമന്ത്രിയുടെ വസതിയിലേക്കും പാര്ട്ടിയുടെ രാജ്യസഭാ, ലോക്സഭാ എംപിമാര് രാഷ്ട്രപതിഭവനിലേക്കും മാര്ച്ച് നടത്താനാണു പദ്ധതിയിട്ടിരുന്നത്.
എന്നാല്, പ്രതിഷേധം കണക്കിലെടുത്ത് ഡല്ഹി പോലീസ് എഐസിസി ആസ്ഥാനത്തും പരിസരത്തും കനത്ത ബന്തവസ് ഏര്പ്പെടുത്തി. ജന്തര് മന്തര് ഒഴികെ ന്യൂഡല്ഹിയില് 144 പ്രഖ്യാപിച്ചു. കോണ്ഗ്രസ് പ്രതിഷേധത്തിന് അനുമതിയും നിഷേധിച്ചു. രാജ്യത്ത് അടിയന്തരാവസ്ഥയാണ് നിലവിലുള്ളതെന്ന് കോണ്ഗ്രസ് കുറ്റപ്പെടുത്തി. എഐസിസി ആസ്ഥാനത്തിനു പുറത്ത് പ്രതിഷേധിക്കുന്നതിനിടെയാണ് രാഹുല് ഗാന്ധിയെ പോലീസ് അറസ്റ്റ് ചെയ്തു നീക്കിയത്. ബാരിക്കേഡ് ചാടിക്കടന്നു മുന്നേറിയ പ്രിയങ്ക ഗാന്ധിയെ പോലീസ് വലിച്ചിഴച്ചാണു നീക്കിയത്. ഇവരെ പിന്നീട് ഡല്ഹി പോലീസിന്റെ കിംഗ്സ് വേ ക്യാന്പിലേക്ക് മാറ്റി. പിന്നീട്, വിട്ടയച്ചു.
എഐസിസി ജനറല് സെക്രട്ടറി കെ.സി വേണുഗോപാല്, എംപിമാരായ രാജ്മോഹന് ഉണ്ണിത്താന്, ഡീന് കുര്യാക്കാസ്, അധീര് രഞ്ജന് ചൗധരി, ശശി തരൂര്, മനീഷ് തിവാരി എന്നിവരെയും പോലീസ് ബലം പ്രയോഗിച്ചാണ് നീക്കം ചെയ്തത്. മുന് ഉത്തരാഖണ്ഡ് മുഖ്യമന്ത്രി ഹരീഷ് റാവത്ത് അടക്കമുള്ള കോണ്ഗ്രസ് നേതാക്കളെയും പോലീസ് അറസ്റ്റ് ചെയ്തു നീക്കി. കോണ്ഗ്രസ് എംപിമാരെ പോലീസ് മര്ദിക്കുകയും വലിച്ചിഴച്ചുകൊണ്ടു പോകുകയും ചെയ്തു എന്ന് അറസ്റ്റിനു മുന്പ് രാഹുല് ഗാന്ധി തന്നെ പറഞ്ഞിരുന്നു. ജനങ്ങള് നേരിടുന്ന പ്രശ്നങ്ങള് ഉയര്ത്തിക്കാട്ടിയാണ് കോണ്ഗ്രസ് പ്രതിഷേധിക്കുന്നത്. ഇതിനെ പോലീസിനെ ഉപയോഗിച്ച് അടിച്ചമര്ത്താനാണ് സര്ക്കാര് ശ്രമിക്കുന്നതെന്നും അദ്ദേഹം കുറ്റപ്പെടുത്തി.
നരേന്ദ്ര മോദി സര്ക്കാര് രാജ്യത്ത തന്നെ അവരുടെ സുഹൃത്തുക്കള്ക്ക് വിറ്റു കഴിഞ്ഞിരിക്കുന്നു. അതിനാല് വിലക്കയറ്റത്തെക്കുറിച്ചോ അതിന്റെ പ്രതികൂല ഫലങ്ങളെക്കുറിച്ചോ അവര്ക്ക് ഒന്നുംതന്നെ അറിയാന് കഴിയുന്നില്ലെന്നാണ് അറസ്റ്റിനുശേഷം പോലീസ് വാഹനത്തിലിരുന്ന പ്രിയങ്ക ഗാന്ധി പ്രതികരിച്ചത്. വിലക്കയറ്റം, തൊഴിലില്ലായ്മ, ജിഎസ്ടി നിരക്കുവര്ധന എന്നിവയില് പ്രതിഷേധിച്ച് സോണിയ ഗാന്ധിയുടെ നേതൃത്വത്തില് പാര്ലമെന്റ് അംഗങ്ങള് ഇന്നലെ കറുപ്പു വസ്ത്രങ്ങളണിഞ്ഞാണു പ്രതിഷേധിച്ചത്. ഇതേ വിഷയങ്ങള് ഉയര്ത്തിക്കാട്ടി കോണ്ഗ്രസ് ഇന്നലെ രാജ്യവ്യാപകമായി പ്രതിഷേധം സംഘടിപ്പിച്ചിരുന്നു. പലയിടത്തും പോലീസ് പ്രവര്ത്തകര്ക്കെതിരേ ജലപീരങ്കി അടക്കം ഉയോഗിച്ചു. ചണ്ഡിഗഡിലും ജമ്മു കാഷ്മീരിലും പോലീസ് കോണ്ഗ്രസ് പ്രവര്ത്തകരുടെ മേല് ബലം പ്രയോഗിക്കുകയും ചെയ്തു.