ദില്ലി: വയനാട്ടില് ഉപതെരഞ്ഞെടുപ്പ് നടന്നാല് സഹോദരിയും കോണ്ഗ്രസ് ജനറല് സെക്രട്ടറിയുമായ പ്രിയങ്ക ഗാന്ധി മത്സരിച്ചേക്കും. രാഹുല് ഗാന്ധിക്കെതിരായ അപകീര്ത്തി കേസിലെ കോടതി നടപടി നിരീക്ഷിച്ച ശേഷം ഇക്കാര്യത്തില് അന്തിമ തീരുമാനമുണ്ടായേക്കും. നിലവില് ഇതുവരെ ഇതുമായി ബന്ധപ്പെട്ട ചര്ച്ചകള് നടന്നിട്ടില്ലെന്നാണ് കോണ്ഗ്രസ് നേതാക്കളില് നിന്നുള്ള സൂചന. കോടതിയില് നിന്നും രാഹുലിന് സ്റ്റേ ലഭിച്ചില്ലെങ്കിലാകും ഉപതെരഞ്ഞെടുപ്പെന്നതിലേക്ക് തെരഞ്ഞെടുപ്പ് കമ്മീഷനെത്തുക. രാഹുല് ഗാന്ധിയെ അയോഗ്യനാക്കിയെന്ന അറിയിപ്പ് ലോക്സഭ സെക്രട്ടറിയേറ്റ് ഇന്നലെ തെരഞ്ഞെടുപ്പ് കമ്മീഷന് കൈമാറിയിരുന്നു. വിഷയം നിയമവിദഗ്ധരുമായി ചര്ച്ച ചെയ്യുന്നുവെന്ന സൂചനയാണ് തെരഞ്ഞെടുപ്പ് കമ്മീഷന് വൃത്തങ്ങള് നല്കുന്നത്.
അതേസമയം, രാഹുല് ഗാന്ധിയെ എം.പി സ്ഥാനത്തുനിന്ന് അയോഗ്യനാക്കിയതിനെതിരെ സംസ്ഥാനത്ത് വ്യാപക പ്രതിഷേധമാണ് അരങ്ങേറുന്നത്. തിരുവനന്തപുരത്ത് രാജ്ഭവനിലേക്ക് മാര്ച്ച് നടത്തിയ കെഎസ്യു പ്രവര്ത്തകര്ക്ക് നേരെ പൊലീസ് ലാത്തി വീശി. സംഘര്ഷത്തില് മൂന്ന് പ്രവര്ത്തകരുടെ തലയ്ക്ക് പരുക്കേറ്റു . കോഴിക്കോടും കോണ്ഗ്രസ് മാര്ച്ചില് സംഘര്ഷം ഉണ്ടായി. കോഴിക്കോട് റെയില്വേ സ്റ്റേഷനിലേക്ക് കോണ്ഗ്രസ് നടത്തിയ മാര്ച്ചും സംഘര്ഷത്തില് കലാശിച്ചു. പ്രവര്ത്തകര് റെയില്വേ സ്റ്റേഷന് അകത്തേക്ക് തള്ളിക്കയറിയതാണ് സംഘര്ഷത്തിന് കാരണം.
