ലഖ്നൗ : പ്രധാന മന്ത്രി നരേന്ദ്ര മോദിയുടെ ലോക്സഭ മണ്ഡലമായ വാരാണസിയില് കിസാന് ന്യായ് റാലിയുമായി കോണ്ഗ്രസ് നേതാവ് പ്രിയങ്ക ഗാന്ധി. റാലിക്ക് തുടക്കമിട്ടുകൊണ്ടുള്ള പൊതുസമ്മേളനത്തില് പ്രധാനമന്ത്രിയ്ക്കും ഉത്തര്പ്രദേശ് സര്ക്കാറിനും എതിരെ പ്രിയങ്ക രൂക്ഷ വിമര്ശനം ഉയര്ത്തി. ലഖിംപൂരില് കര്ഷകര് കൊല്ലപ്പെട്ടിടത്ത് ബി.ജെ.പിയുടെ ഒരു മുതിര്ന്ന നേതാവും സന്ദര്ശിച്ചില്ലെന്ന് പ്രിയങ്ക കുറ്റപ്പെടുത്തി.
”പ്രധാനമന്ത്രി നരേന്ദ്രമോദിയ്ക്ക് ലഖ്നൗ സന്ദര്ശിക്കാം പക്ഷേ, ലഖിംപൂരിലെത്താനാകില്ല. ഇരകളുടെ കുടുംബത്തിന് നീതിയാണ് വേണ്ടത്,പണമല്ല. സോനഭദ്ര കൂട്ടക്കൊലയിലും ഉന്നാവോയിലും ഹത്രസിലും നീതിയില്ല. അതുതന്നെയാണ് ഇവിടെയും സംഭവിക്കുന്നത്.
ലഖിംപൂരിലുള്ള കര്ഷകര് പറയുന്നത് അവര് നീതി ലഭിക്കുമെന്ന പ്രതീക്ഷയില്ലെന്നാണ്. പൊലീസ് അവരുമായി സംസാരിക്കാന് ക്രിമിനലുകളെ കൊണ്ടുവരികയാണ്. ഇങ്ങനെയൊന്നും ലോകത്ത് ഒരിടത്തും നടക്കില്ല. കൊറോണ വന്നപ്പോഴും സര്ക്കാര് തങ്ങളെ സഹായിക്കുമെന്ന ഒരു പ്രതീക്ഷയും അവര്ക്കില്ലായിരുന്നു.
ഇന്ത്യയെന്ന രാജ്യം സ്വാതന്ത്ര്യം നേടിയത് നീതിയെന്ന സങ്കല്പ്പത്തിലാണ്. പക്ഷേ ഇരകളുടെ കുടുംബത്തിന് ഉത്തര്പ്രദേശില് നിന്നും നീതി കിട്ടുമെന്ന ഒരു പ്രതീക്ഷയും ഇല്ല. കേന്ദ്രമന്ത്രിയെയും മകനെയും സര്ക്കാര് സംരക്ഷിക്കുകയാണ്. ടൂര് പോകുന്ന പ്രധാനമന്ത്രിക്ക് കര്ഷകരെ കാണാന് സമയമില്ല.
കേന്ദ്രമന്ത്രി രാജിവെക്കും വരെ പോരാട്ടം തുടരും. ഞങ്ങളെ ആര്ക്കും തടയാനാകില്ല” -പ്രിയങ്ക പറഞ്ഞു. വാരാണസിയില് എത്തിയ പ്രിയങ്ക കാശി വിശ്വനാഥ ക്ഷേത്രവും സന്ദര്ശിച്ചു
