പത്തനംതിട്ട : ബിജെപി നേതാക്കളുടെ പ്രവാചക നിന്ദക്കെതിരെ കുലശേഖരപതി മുസ്ലിം ജമാഅത്ത് കമ്മിറ്റിയുടെ നേതൃത്വത്തിൽ പ്രതിഷേധ റാലിയും പൊതു സമ്മേളനവും സംഘടിപ്പിച്ചു. കുലശേഖരപതി ജമാ-അത്ത് അങ്കണത്തിൽ നിന്നും ആരംഭിച്ച പ്രതിഷേധറാലി ടൗണ് ചുറ്റി സെൻട്രൽ ജംഗ്ഷനിൽ സമാപിച്ചു. തുടർന്നു നടന്ന പൊതുസമ്മേളനം കുലശേഖരപതി ചീഫ് ഇമാം മുഹമ്മദ് സ്വാലിഹ് മൗലവി ഉദ്ഘാടനം ചെയ്തു. പ്രവാചകനെ അധിക്ഷേപിച്ച ബിജെപി നേതാകൾക്കെതിരെ ലോകമെമ്പാടും പ്രതിഷേധങ്ങൾ ഉയർന്നിട്ടും അവർക്കെതിരെ നടപടി സ്വീകരിക്കാത്ത കേന്ദ്ര സർക്കാർ നിലപാടിൽ മാറ്റം വരുത്തണമെന്നും അവരെ ജയിലിലടക്കാനുള്ള ആർജ്ജവം കേന്ദ്രസർക്കാർ കാണിക്കണമെന്നും മുഹമ്മദ് സ്വാലിഹ്മൗലവി ആവശ്യപ്പെട്ടു.
യോഗത്തിന് ജമാഅത്ത് പ്രസിഡന്റ് അൻസാർ മുഹമ്മദ് അധ്യക്ഷത വഹിച്ചു. ടൗണ് ജുമാമസ്ജിദ് ചീഫ് ഇമാം അബ്ദുൽ ശുക്കൂർ മൗലവി മുഖ്യപ്രഭാഷണം നടത്തി. ജമാഅത്ത് സെക്രട്ടറി എസ്.മുഹമ്മദ് റാഷിദ്, എച്ച് ഷാജഹാൻ, യുസുഫ് മോളുട്ടി, സാദിക്ക് അഹമ്മദ്, അഫ്സൽ ആനപ്പാറ, ഷെരീഫ് വലഞ്ചുഴി, അബ്ദുൽ ഹാദി മൗലവി, അഡ്വ.മുഹമ്മദ് അൻസാരി എന്നിവർ സംസാരിച്ചു.
