പള്ളുരുത്തി : കണ്ണൂരില് നടന്ന സി.പി.എം പാര്ട്ടി കോണ്ഗ്രസില് വിലക്ക് ലംഘിച്ച് കെ.വി. തോമസ് പങ്കെടുത്തതില് പ്രതിഷേധിച്ച് ജന്മനാടായ കുമ്പളങ്ങിയില് കോണ്ഗ്രസ് പ്രവര്ത്തകരുടെ പ്രകടനം. ശവമഞ്ചവുമേന്തിയായിരുന്നു നൂറോളം പേര് പങ്കെടുത്ത പ്രതിഷേധം. കുമ്പളങ്ങിയുടെ തെക്കേ അറ്റത്തുനിന്ന് മണ്ഡലം കോണ്ഗ്രസ് കമ്മിറ്റിയുടെ നേതൃത്വത്തില് ആരംഭിച്ച പ്രതീകാത്മക ശവമഞ്ചവുമായുള്ള പ്രകടനം ദ്വീപിന്റെ വടക്കേയറ്റത്താണ് സമാപിച്ചത്. തുടര്ന്ന്, പെരുമ്പടപ്പ് പാലത്തില്നിന്ന് ശവമഞ്ചം കായലിലേക്ക് തള്ളി. പഞ്ചായത്ത് മുന് പ്രസിഡന്റ് എം.പി. ശിവദത്തന്, ബേസില് ചേന്നാംപിള്ളി, നെല്സണ് കോച്ചേരി, ബിജു തത്തമംഗലത്ത്, ജസ്റ്റിന് പുത്തംവീട്ടില് എന്നിവര് പ്രകടനത്തിന് നേതൃത്വം നല്കി.
