മാരാരിക്കുളം : എറണാകുളം – കായംകുളം പാസഞ്ചർ ട്രെയിൻ മാരാരിക്കുളം റെയിൽവേ സ്റ്റേഷനിൽ പിടിച്ചിട്ടതിനെതിരെ യാത്രക്കാർ റെയിൽവെ സ്റ്റേഷനിൽ പ്രതിഷേധിച്ചു. സംഭവത്തിൽ പ്രതിഷേധിച്ച് യാത്രക്കാർ മാരാരിക്കുളം സ്റ്റേഷൻ മാസ്റ്ററെ ഉപരാധിക്കുകയും ചെയ്തു. വൈകിട്ട് 6.25 ന് എറണാകുളത്ത് നിന്ന് യാത്ര തുടങ്ങിയ പാസഞ്ചർ ട്രെയിൻ 7.45 ഓടെ മാരാരിക്കുളം റെയിൽവേ സ്റ്റേഷനിൽ എത്തിയെങ്കിലും കൊച്ചുവേളി, ഷാലിമാർ എക്സ്പ്രസ്സുകൾ കടന്നുപോകാൻ ഏറെനേരം പിടിച്ചിടുകയായിരുന്നുവെന്ന് യാത്രക്കാർ പറയുന്നു.
40 മിനിറ്റോളം പാസഞ്ചർ ട്രെയിൻ മാരാരിക്കുളം സ്റ്റേഷനിൽ പിടിച്ചിട്ടെന്നാണ് യാത്രക്കാർ പറയുന്നത്. തുടർന്ന് മറ്റ് മാർഗങ്ങളില്ലാതെ യാത്രക്കാർ റെയിൽവേ സ്റ്റേഷനിൽ ഇറങ്ങി പ്രതിഷേധിക്കുകയായിരുന്നു. രാത്രി എട്ട് മണിയോടെ ആലപ്പുഴയിൽ എത്തേണ്ട ട്രെയിൻ ഒരു മണിക്കൂറോളം വൈകിയാണ് എത്തിയത്.
