പത്തനംതിട്ട : പുനലൂർ മുവാറ്റുപുഴ ഹൈവേ റോഡ് പണിയുടെ ഭാഗമായി കോന്നി ഇളകൊള്ളൂർ സ്കൂൾ ഭാഗത്തെ ശിൽപശാല – പരുത്തിപ്പടി പഞ്ചായത്ത് റോഡിലേക്കുള്ള ഗതാഗതം മാസങ്ങളായി തടസ്സപ്പെട്ടതിൽ പ്രതിഷേധിച്ച് ബിജെപി പ്രവർത്തകരുടെ നേതൃത്വത്തിൽ സായാഹ്ന പ്രതിഷേധം സംഘടിപ്പിച്ചു. പ്രതിഷേധം ബിജെപി പ്രമാടം ഏരിയ പ്രസിഡന്റ് വി ശങ്കർ ഉദ്ഘാടനം ചെയ്തു. നിലവിൽ സംസ്ഥാന പാതയിലേക്ക് എത്തിയിരുന്ന പഞ്ചായത്ത് റോഡ് മുറിച്ച് രണ്ടര മീറ്ററോളം താഴ്ത്തിയതാണ് വലിയ തിട്ടയായി ഇവിടെ രൂപപ്പെട്ടത്. ഈ ഭാഗം 100 മീറ്റർ ദൂരത്തിൽ മണ്ണ് നീക്കം ചെയ്ത് ചെരിച്ചു കോൺ ക്രീറ്റ് ചെയ്തെങ്കിൽ മാത്രമേ ഗതാഗതം സാധ്യമാകൂ.
200 കുടുംബാംഗങ്ങൾ താമസിക്കുന്ന പ്രദേശത്തേക്കുള്ള വഴിയാണ് മാസങ്ങളായി അടഞ്ഞത്. ഈ ഭാഗത്ത് കെഎസ്ടിപി ഏറ്റെടുത്ത സ്വകാര്യ സ്ഥലം പൂർണമായി ഉപയോഗപ്പെടുത്തിയിട്ടില്ലെന്നും അതിനാൽ അപകട സാധ്യതയുണ്ടന്നും പഞ്ചായത്ത് അംഗവും എംഎൽഎയും ഇടപെടണമെന്നും വി ശങ്കർ പറഞ്ഞു. ന്യുനപക്ഷ മോർച്ച ജില്ലാ പ്രസിഡന്റ് ബിനോയ് കെ മാത്യു മുഖ്യപ്രഭാഷണം നടത്തി. അടിയന്തര പ്രാധാന്യത്തോടെ വഴി പുനഃസ്ഥാപിക്കണമെന്നും ഏറ്റെടുത്ത സ്ഥലം ഉപയോഗിക്കണമെന്നും പരിഹാരം ഉണ്ടാകത്ത പക്ഷം കൂടുതൽ പ്രദേശവാസികൾ വഴിക്കുവേണ്ടി സമര രംഗത്ത് ഇറങ്ങുമെന്നും ബിനോയ് കെ മാത്യു പറഞ്ഞു.
കർഷകമോർച്ച സംസ്ഥാന സമിതി അംഗം പി കെ വിജയകുമാർ, കർഷകമോർച്ച കോന്നി നിയോജകമണ്ഡലം ജനറൽ സെക്രട്ടറി ബിനു ഇളകൊള്ളൂർ, ബിജെപി പ്രമാടം ഏരിയ സെക്രട്ടറി അനീഷ് ആനന്ദ്, സോഷ്യൽ മീഡിയ കൺവീനർ മനു ഇളകൊള്ളൂർ, കര്ഷകമോർച്ച പഞ്ചായത്ത് പ്രസിഡന്റ് പ്രേംചന്ദ്ര, അലക്സ് കെ പോൾ,എം പി ജോസ്, റെജി മടക്കുമൂട്ടിൽ, സജി ജോർജ്, ബിജെപി 104 ബൂത്ത് പ്രസിഡന്റ് പ്രദീപ് മേലേടത്ത് പ്രദേശവാസികളും പങ്കെടുത്തു
