അടൂര് : അടൂര് – പത്തനാപുരം റോഡില് രൂപപ്പെട്ട വലിയ കുഴി നികത്താതെ സ്ഥലത്ത് വീപ്പ സ്ഥാപിച്ച് അധികൃതര്. ഇപ്പോള് കുഴിയും വീപ്പയും കൂടുതല് അപകടക്കെണിയായി മാറിയിരിക്കുകയാണ്. ദിവസവും നൂറുകണക്കിന് വാഹനങ്ങള് കടന്നുപോകുന്ന പാതയാണ് കെ.പി റോഡ്. ഒരാഴ്ച മുന്പ് ചെറിയ കുഴി മാത്രമായിരുന്നു ആദ്യം ഉണ്ടായിരുന്നത്. പിന്നീട് ഇത് വലിയ ഗര്ത്തമായി മാറുകയായിരുന്നുവെന്നാണ് സമീപത്തെ വ്യാപാരികള് പറയുന്നത്. ഗര്ത്തത്തില് ചാടി വാഹനങ്ങള് പതിവായി അപകടത്തില്പ്പെട്ട് തുടങ്ങിയതോടെ നാട്ടുകാര് പൊതുമാരാമത്ത് അധികൃതരെ സമീപിച്ചു.
എന്നാല് കുഴി അടയ്ക്കുവാനുള്ള നടപടികള് സ്വീകരിക്കാതെ കല്ലുകള് നിറച്ച വീപ്പ അപകട സൂചനയായി സ്ഥാപിക്കുക മാത്രമാണ് ചെയ്തത്. രാത്രിയില് പത്തനാപുരം ഭാഗത്ത് നിന്നും വരുന്ന വാഹനങ്ങള്ക്ക് വീപ്പയും കുഴിയും പെട്ടന്ന് കാണുവാന് സാധിക്കാത്തത് വലിയ അപകടങ്ങള്ക്ക് കാരണമാകും. കഴിഞ്ഞ ദിവസം ഈ വീപ്പയില് കാര് ഇടിച്ച് അപകടം സംഭവിച്ചിരുന്നു. പൊതുമരാമത്ത് ഓഫീസിന് ഏതാനും മീറ്ററുകള് മാത്രം അകലെയാണ് ഈ സ്ഥലം എന്നത് അധികൃതരുടെ അനാസ്ഥ എത്രത്തോളം ഉണ്ടെന്ന് വ്യക്തമാക്കുകയാണ്.
