പത്തനംതിട്ട: പള്സ് പോളിയോ ഇമ്മ്യൂണൈസേഷന് ജില്ലാതല ഉദ്ഘാടനം ജൂണ് 28 രാവിലെ എട്ടിന് അടൂര് ജനറല് ആശുപത്രിയില് ടൂറിസം – സാംസ്കാരിക വകുപ്പ് മന്ത്രി പി.സി വിഷ്ണുനാഥ് നിര്വഹിക്കും. ഭാരതത്തെ പോളിയോ വിമുക്തമാക്കുന്നതിന് ദേശവ്യാപകമായി നടത്തുന്ന പരിപാടിയുടെ ക്രമീകരണങ്ങള് പൂര്ത്തിയായതായും ജൂണ് 28ന് തന്നെ അഞ്ചു വയസ്സിനു താഴെയുള്ള എല്ലാ കുഞ്ഞുങ്ങള്ക്കും ഓരോ ഡോസ് തുള്ളി മരുന്ന് നല്കുന്നുവെന്ന് രക്ഷകര്ത്താക്കള് ഉറപ്പുവരുത്തണമെന്നും ജില്ല മെഡിക്കല് ഓഫീസര് (ആരോഗ്യം) ഡോ.എല്.അനിതകുമാരി അറിയിച്ചു.
ജില്ലയില് അഞ്ചു വയസ്സിനു താഴെയുളള 47,739 കുട്ടികള്ക്കാണ് തുള്ളിമരുന്ന് നല്കുക. ഇതിനായി 967 ബൂത്തുകള് സജ്ജീകരിക്കും. തുള്ളിമരുന്ന് നല്കാന് 3156 സന്നദ്ധപ്രവര്ത്തകര്ക്ക് പരിശീലനം നല്കി. സര്ക്കാര് ആശുപത്രികള്, ആരോഗ്യകേന്ദ്രങ്ങള്, ജനകീയ ആരോഗ്യകേന്ദ്രങ്ങള്, നഗരാരോഗ്യകേന്ദ്രങ്ങള്, അങ്കണവാടികള്, സ്വകാര്യ ആശുപത്രികള്, വായനശാലകള്, സ്കൂളുകള്, സന്നദ്ധസംഘടനകളുടെ കെട്ടിടങ്ങള് എന്നിവയുള്പ്പെടെ ജനങ്ങള്ക്ക് ഏറ്റവും സൗകര്യപ്രദമായ സ്ഥലങ്ങളില് ബൂത്തുകള് ക്രമീകരിക്കും.
സാധാരണ ബൂത്തുകള്ക്ക് പുറമെ യാത്രാവേളയില് കുഞ്ഞുങ്ങള്ക്ക് വാക്സിന് നല്കുന്നതിന് 17 ട്രാന്സിറ്റ് ബൂത്തുകള്, രണ്ട് മൊബൈല് ബൂത്തുകള് എന്നിവയുമുണ്ടാകും. റെയില്വേ സ്റ്റേഷന്, ബസ് സ്റ്റാന്ഡ് എന്നിവിടങ്ങളിലാകും ട്രാന്സിറ്റ് ബൂത്തുകള് പ്രവര്ത്തിക്കുക. ഇതരസംസ്ഥാന തൊഴിലാളികളുടെ താമസസ്ഥലങ്ങള്, ദുര്ഘട പ്രദേശങ്ങള് എന്നിവയുള്പ്പെടെ ജനങ്ങള് എത്തുന്ന സ്ഥലങ്ങളില് മരുന്ന് നല്കുന്നതിന് മൊബൈല് ബൂത്തുകളും സജ്ജീകരിക്കും.
1980 കളില് രാജ്യത്ത് പ്രതിവര്ഷം ഒന്നര ലക്ഷത്തിലധികം കുട്ടികള്ക്ക് അംഗവൈകല്യത്തിനു കാരണമായ പോളിയോ രോഗം 1995 ല് പള്സ് പോളിയോ ഇമ്മ്യൂണൈസേഷന് ആരംഭിച്ചതിനു ശേഷം ക്രമമായി കുറച്ചു കൊണ്ടുവന്ന് 2011 ന് ശേഷം പൂര്ണമായും നിര്മാര്ജ്ജനം ചെയ്തു. 2026 ജനുവരി 13 ന് രാജ്യം പോളിയോ വിമുക്തമായി 15 വര്ഷം പിന്നിട്ടു. എന്നാല് ഇന്ത്യയുടെ അയല്രാജ്യങ്ങള് ഉള്പ്പടെ ചില രാജ്യങ്ങളില് ഇപ്പോഴും രോഗം റിപ്പോര്ട്ട് ചെയ്യപ്പെടുന്നുണ്ട്. പോളിയോ രോഗം ഭൂമുഖത്ത് നിന്ന് തുടച്ചു നീക്കുന്നതിന്റെ അവസാന ഘട്ടത്തിലാണ് ലോകം.
പള്സ് പോളിയോ ദിനത്തില് ബൂത്തുകളില് എത്താത്ത കുഞ്ഞുങ്ങള്ക്ക് ജൂണ് 29, 30 തീയതികളില് വീടുകളിലെത്തി വാക്സിന് നല്കും. ആരോഗ്യ പ്രവര്ത്തകര്ക്ക് പുറമേ ആശാ, അങ്കണവാടി, കുടുംബശ്രീ പ്രവര്ത്തകര് എന്നിവരാണ് വാളന്റിയര്മാര്. ആരോഗ്യവകുപ്പിന്റെ നേതൃത്വത്തില് ആരോഗ്യകേരളം, തദ്ദേശസ്വയംഭരണ വകുപ്പ്, വനിതാ-ശിശു വികസന വകുപ്പ്, പൊതുവിദ്യാഭ്യാസവകുപ്പ്, കുടുബശ്രീ മിഷന്, സാക്ഷരതാ മിഷന് തുടങ്ങിയ സര്ക്കാര് വകുപ്പുകളുടെയും റോട്ടറി ഇന്റര്നാഷണല് തുടങ്ങിയ സന്നദ്ധസംഘടനകളുടെയും ആഭിമുഖ്യത്തിലാണ് പരിപാടി നടക്കുക.
