പത്തനംതിട്ട : പുനലൂര് – മൂവാറ്റുപുഴ ഹൈവേയുടെ കുമ്പഴയിലെ നിര്മ്മാണം അട്ടിമറിക്കാന് നീക്കം. കുമ്പഴ ജംഗ്ഷനില് കെ.എസ്.ടി.പി ഏറ്റെടുത്ത് കല്ലുകള് സ്ഥാപിച്ച സ്ഥലം വിട്ടുകൊടുക്കാതെ കെട്ടിട ഉടമകള്. അവിഹിത സ്വാധീനത്തിലൂടെ നിര്മ്മാണം അട്ടിമറിക്കുവാനാണ് നീക്കം. ഇതോടെ തിരക്കേറിയ കുമ്പഴ ജംഗ്ഷനില് റോഡിന് വീതി കുറയും.
ചില കെട്ടിടത്തിന്റെ വരാന്തയും ചിലരുടെ കടയുടെ ഭാഗങ്ങളും പൊളിച്ചു നീക്കി മാത്രമേ പാതയുടെ നിര്മ്മാണം കൃത്യമായി പൂര്ത്തീകരിക്കുവാന് കഴിയൂ. റോഡിന്റെ ഒരു സൈഡില് ഏറ്റെടുത്ത സ്ഥലം പൂര്ണ്ണമായി ഉപയോഗിച്ച് ഓട നിര്മ്മിച്ചിരുന്നു. എന്നാല് മറുവശത്ത് നിര്മ്മാണം ആരംഭിക്കാനിരിക്കെ ചിലര് ഇടപെട്ട് നിര്മ്മാണം നിര്ത്തി വെപ്പിക്കുകയായിരുന്നു. എന്നാല് ഇതിനെതിരെ നാട്ടുകാര് പരാതിയും പ്രശ്നങ്ങളുമായി രംഗത്തെത്തി. കെ.എസ്.ടി.പി ഉദ്യോഗസ്ഥര് എത്തി ചുവന്ന പെയിന്റ് ഉപയോഗിച്ച് റോഡ് നിര്മ്മാണത്തിന്റെ അതിരുകള് വരച്ചിട്ടിരുന്നു. ഈ ഭാഗമാണ് കെട്ടിട ഉടമകള് വിട്ടുനല്കാന് മടിക്കുന്നത്.
തര്ക്കത്തെ തുടര്ന്ന് കെ.എസ്.ടി.പി എക്സിക്യുട്ടീവ് എഞ്ചിനിയര് ജാസ്മിന് ഉള്പ്പെടെയുള്ള ഉദ്യോഗസ്ഥരും കരാര് ഏറ്റെടുത്ത ടി.കെ.കെ കമ്പിനിയുടെ പ്രതിനിധികളും ഇന്ന് കുമ്പഴയില് എത്തി സ്ഥലം പരിശോധിച്ചു. തര്ക്കങ്ങള്ക്ക് അടിസ്ഥാനമില്ലെന്നും ഏറ്റെടുത്ത സ്ഥലം നിര്മ്മാണത്തിന് പൂര്ണ്ണമായി ഉപയോഗിക്കുമെന്നും കെ.എസ്.ടി.പി അധികൃതര് പറഞ്ഞു.