കോന്നി : പുനലൂർ മൂവാറ്റുപുഴ സംസ്ഥാന പാതയിൽ വകയാറിൽ കനത്ത മഴയെ തുടർന്ന് വെള്ളം കയറി. കഴിഞ്ഞ രാത്രിയിൽ ആയിരുന്നു സംഭവം. വകയാറിൽ സംസ്ഥാന പാതയുടെ സമീപത്ത് കൂടി ഒഴുകുന്ന തോട്ടിൽ നിന്ന് വെള്ളം റോഡിലേക്ക് കയറുകയായിരുന്നു. ഏറെ നേരം ഗതാഗതം തടസപ്പെടുകയും ചെയ്തു. സംസ്ഥാന പാതയിൽ ഈ ഭാഗത്ത് മഴക്കാലത്ത് റോഡിലേക്ക് വെള്ളം കയറുന്നത് പതിവാണ്. സംസ്ഥാന പാതയുടെ നിർമാണം നടക്കുന്ന സമയത്ത് തോട്ടിൽ നിന്ന് വെള്ളം റോഡിലേക്ക് കയറുന്നത് തടയുവാനുള്ള മാർഗങ്ങൾ അധികൃതർ സ്വീകരിച്ചില്ല എന്നും പ്രദേശവാസികൾ പറയുന്നു.
ഓട യഥാസമയം വൃത്തിയാക്കാത്തതും റോഡിൽ വെള്ളം നിറയുന്നതിന് കാരണമാകുന്നുണ്ട്. റോഡിൽ നിറയുന്ന വെള്ളം ഓടയിലേക്ക് ഒഴുകി പോകുവാൻ ഉള്ള ദ്വാരങ്ങൾ പലതും അടഞ്ഞതും സംസ്ഥാന പാതയിലെ വെള്ളകെട്ട് വർധിപ്പിക്കുന്നു. ശബരിമല മണ്ഡല കാലത്തിന് മുന്നോടിയായി ഈ പ്രവർത്തികൾ എല്ലാം പൂർത്തിയാക്കേണ്ടതായിരുന്നു. സംസ്ഥാന പാതയിൽ ഏറ്റവും തിരക്കുള്ള ഈ സമയം മഴക്കാലത്ത് റോഡിൽ വെള്ളം നിറയുന്നത് ശബരിമല തീർധാടനത്തെയും സാരമായി ബാധിക്കും.
