തിരുവനന്തപുരം: പറവൂർ മണ്ഡലത്തിൽ നടപ്പിലാക്കിയ പുനജനി പദ്ധതിയിൽ വിദേശനാണയ ചട്ടം ലംഘനം നടന്നുവെന്ന് ചൂണ്ടികാട്ടി വിഡി സതീശനെതിരെ സിബിഐ അന്വേഷണത്തിന് ശുപാര്ശ നൽകിയ വിജിലന്സ് നീക്കത്തിൽ പ്രതിപക്ഷ നേതാവിന് പൂര്ണ പിന്തുണയുമായി യുഡിഎഫിന്റെ അസോസിയേറ്റ് അംഗം പിവി അൻവര്. പ്രതിപക്ഷത്തിനെതിരെ മുഖ്യമന്ത്രി പിണറായി വിജയൻ വൈരാഗ്യ ബുദ്ധിയോടെ നീങ്ങുകയാണെന്നും പ്രതിപക്ഷ നേതാവിനെതിരായ പടയൊരുക്കത്തെ നേരിടാൻ താനും തന്റെ പാര്ട്ടിയും തയ്യാറാണെന്നും പിവി അൻവര് ഫേസ്ബുക്കിൽ കുറിച്ചു.
മുഖ്യമന്ത്രി പ്രതിസന്ധിയിലാകുമ്പോൾ പ്രതിയോഗികൾക്കെതിരെ കേസുകളും അന്വേഷണങ്ങളും ആരോപണങ്ങളും വരും. ഇക്കാര്യം അറിയുന്ന ആളുകളിൽ മുൻപന്തിയിലാണ് താനെന്നും പ്രതിപക്ഷത്തിനും പ്രതിപക്ഷ നേതാവിനുമെതിരായ ഏതു ആക്രമണത്തെയും നേരിടുമെന്നും പിവി അൻവര് പറഞ്ഞു.
