ഭോപ്പാല്: കോണ്ഗ്രസ് നേതാവ് രാഹുല് ഗാന്ധിക്കെതിരെ മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന്. രാജ്യത്തെക്കുറിച്ചോ ദേശീയ നയങ്ങളെക്കുറിച്ചോ അറിവില്ലാത്ത നേതാവാണ് രാഹുല് ഗാന്ധി. രാജ്യം പ്രവര്ത്തിക്കുന്നത് ഭരണഘടനയിലാണ്, വാക്കുകളിലല്ല. കോണ്ഗ്രസാണ് രാജ്യത്തിന്റെ പ്രശ്നമെന്നും കോണ്ഗ്രസിന്റെ പ്രശ്നം രാഹുല് ഗാന്ധിയാണെന്നും അദ്ദേഹം പറഞ്ഞു. ഡല്ഹിയില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
കോണ്ഗ്രസാണ് രാജ്യത്തിന്റെ പ്രശ്നം. പക്ഷേ കോണ്ഗ്രസിന്റെ പ്രശ്നം രാഹുല് ഗാന്ധിയാണ്. രാജ്യത്തെ എല്ലാ ജനങ്ങള്ക്കും ഇതറിയാം. കോണ്ഗ്രസിനിപ്പോള് രാഹുകാലമാണ്. നെഹ്റു കുടുംബത്തിലെ അടിമകളായ നേതാക്കള് രാഹുലിനെ ദേശീയ നേതാവാക്കാന് തീരുമാനിച്ചു. പക്ഷേ രാഹുല് വന് പരാജയമാണ്, അങ്ങേയറ്റം അഹങ്കാരവുമുള്ള ആളാണ് രാഹുല്. അഹങ്കാരം മൂത്താണ് രാഹുല് ഗാന്ധി പിന്നാക്ക ജാതിയില് പെട്ടവരെ അപമാനിക്കുന്നത്. പിന്നാക്ക വിഭാഗത്തില്പെട്ടവര് തന്നെ വെല്ലുവിളിക്കാന് വരില്ലെന്ന് രാഹുലിന് അറിയാം. അതുകൊണ്ട് തന്നെയാണ് അയാള് അധിക്ഷേപം തുടരുന്നതെന്നും ശിവരാജ് സിംഗ് ചൗഹാന് ആരോപിച്ചു.
