ശിവസാഗര് : ആസാമില് കോണ്ഗ്രസ് അധികാരത്തിലെത്തിയാല് പൗരത്വ ഭേദഗതി നിയമം(സിഎഎ) നടപ്പാക്കില്ലെന്ന് കോണ്ഗ്രസ് നേതാവ് രാഹുല് ഗാന്ധി. ആസാം ജനതയുടെ മൂല്യങ്ങള് കോണ്ഗ്രസ് പാര്ട്ടി സംരക്ഷിക്കുമെന്നും ഒരിക്കലും സിഎഎ നടപ്പാക്കില്ലെന്നും തെരഞ്ഞെടുപ്പ് പ്രചാരണ റാലിയില് രാഹുല് പറഞ്ഞു.
ജനങ്ങളുടെ ശബ്ദം കേള്ക്കുന്ന സ്വന്തം മുഖ്യമന്ത്രിയാണ് ആസാമിന് വേണ്ടത്. നാഗ്പുരില് നിന്നോ ഡല്ഹിയില് നിന്നോ നിര്ദേശങ്ങള് സ്വീകരിക്കുന്ന മുഖ്യമന്ത്രിയല്ല വേണ്ടത്. ആസാം ജനതയുടെ യോജിപ്പ് സമാധാനം കൊണ്ടുവരും. അസം ജനതയുടെ യോജിപ്പ് താനും തന്റെ പാര്ട്ടിയും സംരക്ഷിക്കും. അതില് നിന്ന് അണുവിട വ്യതിചലിക്കില്ലെന്നും അദ്ദേഹം പറഞ്ഞു.
“ആര്എസ്എസും ബിജെപിയും ആസാമിനെ വിഘടിക്കാന് ശ്രമിക്കുകയാണ്. ആസാം വിഘടിച്ചാല് പ്രധാനമന്ത്രി നരേന്ദ്ര മോദിക്കോ കേന്ദ്ര ആഭ്യന്തര മന്ത്രിക്കോ യാതൊരു പ്രശ്നവുമില്ല. പക്ഷേ ആസാമിനെയും രാജ്യത്തെയുമാണത് ബാധിക്കുക’- രാഹുല് ഗാന്ധി പറഞ്ഞു.
