ഷൊര്ണൂര് : റെയില്വേ സിഗ്നല് ബോക്സുകളില് ഉപയോഗിക്കുന്ന ചെമ്പുകമ്പികള് മോഷ്ടിച്ച തിരൂര് സ്വദേശി ഷിജു, വാവന്നൂര് സ്വദേശി അഷ്റഫ് അലി, മരുതൂര് സ്വദേശി ജബ്ബാര്, മുണ്ടൂര്ക്കര സ്വദേശി സുജിത്, ഓങ്ങല്ലൂര് സ്വദേശി മുഹമ്മദ് ഹനീഫ, പട്ടാമ്ബി സ്വദേശി സുബൈര് എന്നിവരെ ഷൊര്ണൂര് റെയില്വേ സംരക്ഷണ സേനയും പാലക്കാട് ക്രൈം ഇന്റലിജന്സ് സംഘവും അറസ്റ്റ് ചെയ്തു. പട്ടാമ്പി, പള്ളിപ്പുറം, കുറ്റിപ്പുറം, തിരുനാവായ, തിരൂര്, പരപ്പനങ്ങാടി റെയില്വേ സ്റ്റേഷനുകളുടെ സമീപത്തെ ട്രാക്കിനോട് ചേര്ന്ന സിഗ്നല് ബോക്സുകളില് നിന്ന് കഴിഞ്ഞ രണ്ടുമാസത്തിനിടെ ചെമ്പ് കമ്പി മോഷണം പതിവായിരുന്നു.
മോഷ്ടിച്ച ചെമ്പ് കമ്പികള് ഞാങ്ങാട്ടിരിയിലെയും കൂമക്കല്ലിലെയും ആക്രി കടകളിലാണ് ഇവര് വില്പന നടത്തിയത്. പ്രതികളെ മഞ്ചേരി ജുഡീഷ്യല് മജിസ്ട്രേറ്റ് കോടതിയില് ഹാജരാക്കി റിമാന്ഡ് ചെയ്തു. സാങ്കേതിക തകരാറായിരിക്കുമെന്ന് കരുതി പലതവണ ശരിയാക്കിയിട്ടും പ്രശ്നം തുടര്ന്നതോടെയാണ് ചെമ്പ് കമ്പി മോഷണം ശ്രദ്ധയില്പെട്ടതെന്ന് അധികൃതര് പറഞ്ഞു.
