മംഗലപുരം : അര്ധരാത്രിയില് ഡ്യൂട്ടിയിലായിരുന്ന റെയില്വേ സ്റ്റേഷന് ജീവനക്കാരിയെ വെട്ടിപ്പരിക്കേല്പിച്ച് മാല കവര്ന്നു. മുരുക്കുംപുഴ റെയില്വേ സ്റ്റേഷനിലെ റെയില്വേ പോയിന്റ്സ് മാനായ ജലജകുമാരി (45) യെയാണ് ആക്രമിച്ച് സ്വര്ണം കവര്ന്നത്. ചൊവ്വാഴ്ച രാത്രി 11.30നാണ് സംഭവം. ഈ സമയം കടന്നുപോയ ഗുരുവായൂര് എക്സ്പ്രസിന് ഫ്ളാഗ് കാണിക്കുന്നതിനിടെയായിരുന്നു ആക്രമണം. റെയില്വേ സ്റ്റേഷന് എതിര്വശത്തുനിന്ന് ട്രെയിനിന് കൊടി കാണിക്കുന്നതിനിടയില് പിന്നിലൂടെ വന്ന അക്രമി വെട്ടുകത്തി വീശി കഴുത്തിലെ മാല പൊട്ടിച്ച് രക്ഷപ്പെടാന് ശ്രമിച്ചു.
തടഞ്ഞ ജലജകുമാരിയെ വെട്ടുകയും പ്ലാറ്റ്ഫോമില് നിന്നും പാളത്തിലേക്ക് തള്ളിയിട്ട് അപായപ്പെടുത്താനും ശ്രമിച്ചു. റെയില്വേ ട്രാക്കിലേക്ക് മറിഞ്ഞുവീണ യുവതി ചാടി എഴുന്നേല്ക്കുന്നതിനിടയില് മോഷ്ടാവ് ഇരുളിലേക്ക് രക്ഷപ്പെടുകയായിരുന്നു. പൊട്ടിയ മാലയുടെ ചെറിയൊരുഭാഗം സംഭവസ്ഥലത്തുനിന്ന് കിട്ടി. ട്രാക്കിലേക്ക് വീണ യുവതിയുടെ കൈ ഒടിയുകയും പാലത്തില് ഇടിച്ച് തലക്ക് പരിക്കേല്ക്കുകയും ചെയ്തു.
ഇവരെ പേട്ട റെയില്വേ ആശുപത്രിയില് പ്രവേശിപ്പിച്ചു. ട്രെയിന് കടന്നുപോകുന്ന സമയത്തായതിനാല് എതിര് വശത്തുനിന്ന സ്റ്റേഷന് മാസ്റ്ററും സംഭവം കണ്ടില്ല. ഇവിടെ മുന്പും ഇത്തരത്തില് സാമൂഹിക വിരുദ്ധരുടെ ശല്യമുണ്ടായതിനെ തുടര്ന്ന് സ്റ്റേഷന് പരിസരത്ത് ഉള്പ്പെടെ സി.സി.ടി.വി കാമറകള് സ്ഥാപിച്ചിരുന്നു. മംഗലപുരം പോലീസും ആര്.പി.എഫും കേസ് രജിസ്റ്റര് ചെയ്ത് അേന്വഷണം ആരംഭിച്ചു.
