തിരുവനന്തപുരം : കേരളത്തിൽ വരും ദിവസങ്ങളിൽ മഴ ശക്തമാകുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇന്നും സംസ്ഥാനത്തെ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴ തുടരാൻ സാധ്യത. ഇന്ന് ജില്ലകളിൽ മഴ മുന്നറിയിപ്പുകൾ നിലവിലില്ലെങ്കിലും നാളെ പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്. മറ്റന്നാൾ കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലും യെല്ലോ അലേർട്ട് ആയിരിക്കും. ഈ ജില്ലകളിൽ ഒറ്റപ്പെട്ട ശക്തമായ മഴയ്ക്കും മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുണ്ട്.
മെയ് 26-ന് കേരളത്തിൽ എത്തുമെന്ന് കരുതിയിരുന്ന കാലവർഷം ഇത്തവണ വൈകുമെന്നാണ് പുതിയ വിവരം. ഈ മാസം അവസാനത്തോടു കൂടിയോ ജൂൺ ആദ്യവാരമോ മാത്രമേ കാലവർഷം കേരളത്തിൽ പ്രവേശിക്കാൻ സാധ്യതയുള്ളൂ. നിലവിൽ ലഭിക്കുന്നത് വേനൽമഴയുടെ തുടർച്ചയാണെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
