മലപ്പുറം : കനത്ത മഴയില് കൊണ്ടോട്ടിക്കും രാമനാട്ടുകരക്കും ഇടയില് ദേശീയ പാതയില് മിക്കയിടത്തും വെള്ളം കയറി ഗതാഗതം തടസ്സപ്പെട്ടു. പുളിക്കല്, പെരിയമ്പലം, ഐക്കരപ്പടി, തുറക്കല് തുടങ്ങിയ ഭാഗത്തെല്ലാം റോഡില് വെള്ളം കയറിയിട്ടുണ്ട്. രാവിലെ മുതല് നിരവധി വാഹനങ്ങള് ഈ ഭാഗങ്ങളില് കുടുങ്ങിക്കിടന്നു. രാമനാട്ടുകര ഭാഗത്തുനിന്ന് വരുന്ന വലിയ വാഹനങ്ങള് ഒഴികെ മറ്റു വാഹനങ്ങള് കാക്കഞ്ചേരി, ചേളാരി ഭാഗങ്ങളിലൂടെയാണ് പോകുന്നത്.
തോടുകള് പലതും നിറഞ്ഞൊഴുകുന്നുണ്ട്. നിരവധി വീടുകളില് വെള്ളം കയറി. ചെറുകാവ് പഞ്ചായത്തില് നിരവധി ഭാഗങ്ങളില് വീടുകള്ക്കും നാശനഷ്ടമുണ്ട്. ശക്തമായി മഴ തുടരുന്നതിനാല് ഈ ഭാഗങ്ങളില് വൈദ്യുതിബന്ധം വിച്ഛേദിച്ചിരിക്കുകയാണ്. പുളിക്കല് ബി.എം ആശുപത്രിയിലും വെള്ളം കയറി.
