ഷാര്ജ : നിരാശ മാത്രം സമ്മാനിച്ച് റോയല് ചലഞ്ചേഴ്സ് ബാംഗ്ലൂര് മറ്റൊരു ഐപിഎല് സീസണ്കൂടി അവസാനിപ്പിക്കുന്നു. എലിമിനേറ്ററില് കൊല്ക്കത്ത നൈറ്റ് റൈഡേഴ്സിനോട് തോറ്റതോടെ ടീം ഫൈനല് കാണാതെ പുറത്തായി. ഇന്നലെ നാല് വിക്കറ്റിനായിരുന്നു കൊല്ക്കത്തയുടെ ജയം. ടോസ് നേടി ബാറ്റിംഗിന് ഇറങ്ങിയ ബാംഗ്ലൂര് ഏഴ് വിക്കറ്റ് നഷ്ടത്തില് 138 റണ്സ് നേടി. മറുപടി ബാറ്റിംഗില് കൊല്ക്കത്ത 19.4 ഓവറില് ആറ് വിക്കറ്റ് നഷ്ടത്തില് ലക്ഷ്യം മറികടന്നു.
കൊല്ക്കത്തയുടെ രണ്ട് വിക്കറ്റ് വീഴ്ത്തിയത് പേസര് ഹര്ഷല് പട്ടേലായിരുന്നു. ബാംഗ്ലൂര് ഐപിഎല്ലില് നിന്ന് പുറത്തായെങ്കിലും ഹര്ഷല് ഒരു റെക്കോഡിനൊപ്പമെത്തി. ഒരു സീസണില് ഏറ്റവും കൂടുതല് വിക്കറ്റുകളെന്ന റെക്കോഡിനൊപ്പമാണ് ഹര്ഷല്. സീസണില് 32 വിക്കറ്റുകളാണ് ഹര്ഷല് സ്വന്തമാക്കിയത്. കളിച്ചത് 15 മത്സരങ്ങള് മാത്രം. ചെന്നൈ സൂപ്പര് കിംഗ്സിന്റെ (ചെന്നൈ സൂപ്പര് കിംഗ്സ്) ഡ്വെയ്ന് ബ്രാവോയും ഒരു സീസണില് 32 വിക്കറ്റുകള് വീഴ്ത്തിയിരുന്നു. 2013 എഡിഷനില് ബ്രാവോ 32 വിക്കറ്റ് നേടി റെക്കോഡിട്ടത്.
ഐപിഎല്ലിലെ ഒരു സീസണില് ഏറ്റവും കൂടുതല് വിക്കറ്റ് നേടുന്ന ഇന്ത്യന് ബൗളറെന്ന റെക്കോഡ് ഈ സീസണിനിടെ ഹര്ഷല് സ്വന്തമാക്കിയിരുന്നു. 2020 സീസണില് 27 വിക്കറ്റ് നേടിയ മുംബൈ ഇന്ത്യന്സ് പേസര് ജസ്പ്രീത് ബുമ്രയാണ് ഹര്ഷലിന് മുന്നില് വഴിമാറിയത്. സണ്റൈസേഴ്സ് ഹൈദരാബാദിന് എതിരായ മത്സരത്തില് മൂന്ന് വിക്കറ്റ് നേട്ടത്തോടെയാണ് താരം ഈ റെക്കോഡിലെത്തിയത്.
ഐപിഎല്ലില് ഒരു സീസണില് കൂടുതല് വിക്കറ്റ് നേടുന്ന അണ്ക്യാപ്ഡ് താരം എന്ന റെക്കോര്ഡും ഇത്തവണ താരത്തിന് സ്വന്തമായി. ആഭ്യന്തര ക്രിക്കറ്റില് ഹരിയാനയ്ക്ക് വേണ്ടി കളിക്കുന്ന താരം ഈ സീസണില് പര്പ്പിള് ക്യാപ് ഉറപ്പിച്ചു. സീസണിലെ വിക്കറ്റ് വേട്ടയില് രണ്ടാം സ്ഥാനത്തുള്ള ഡല്ഹി ക്യാപിറ്റല്സ് പേസര് ആവേശ് ഖാനേക്കാള് ഒമ്പത് വിക്കറ്റ് കൂടുതല് ഇപ്പോള്ത്തന്നെ ഹര്ഷലിനുണ്ട്. 23 വിക്കറ്റാണ് ആവേശിന്റെ സമ്പാദ്യം. ആര്സിബിയുടെ ക്യാപ്റ്റനായി അവസാന മത്സരാണ് വിരാട് കോലി കളിച്ചത്. ഈ സീസണോടെ നായകസ്ഥാനം ഒഴിയുമെന്ന് കോലി അറിയിച്ചിരുന്നു.
