രാജ്കോട്ട്: ഗുജറാത്തിലെ രാജ്കോട്ട് ജില്ലയില്‍ അടച്ചിട്ട റോഡ് തുറക്കാനുള്ള നാട്ടുകാരുടെ ശ്രമം പോലീസുമായുള്ള സംഘര്‍ഷത്തില്‍ കലാശിച്ചു. സംഭവത്തില്‍ 68 പേരെ അറസ്റ്റ് ചെയ്തു. ശനിയാഴ് ച അര്‍ധരാത്രി രാജ്കോട്ടിലെ ജംഗലേശ്വറിലാണ് സംഭവം. ധാരാളം കോവിഡ് കേസുകള്‍ റിപ്പോര്‍ട്ട് ചെയ്ത പ്രദേശത്ത് ബാരിക്കേഡുകള്‍ സ്ഥാപിച്ചിരുന്നു. ഇത് നീക്കം ചെയ്യാനുള്ള പ്രദേശവാസികളുടെ ശ്രമം സുരക്ഷാ ഉദ്യോഗസ്ഥര്‍ തടയുകയായിരുന്നു. തുടര്‍ന്ന് നാട്ടുകാര്‍ പോലീസിന് നേരെ കല്ലെറിയുകയും വാഹനങ്ങള്‍ക്ക് കേടുപാട് വരുത്തുകയും ചെയ്തു.
സംഘര്‍ഷം നിയന്ത്രിക്കാന്‍ പോലീസ് കണ്ണീര്‍ വാതക ഷെല്ലുകള്‍ പ്രയോഗിക്കുകയും ലാത്തിച്ചാര്‍ജ്ജ് നടത്തുകയും ചെയ്തു. അതേ സമയം അടച്ചിട്ട മറ്റു ചില പ്രദേശങ്ങളിലെ ബാരിക്കേഡുകള്‍ ഉദ്യോഗസ്ഥര്‍ നീക്കിയിരുന്നതായും ജംഗലേശ്വറിലേത് നീക്കം ചെയ്യാത്തതില്‍ ആളുകള്‍ അസ്വസ്ഥരായിരുന്നുവെന്നും ഭക്തിനഗറിലെ പോലീസ് ഇന്‍സ്പെക്ടര്‍ വി.കെ. ഗാദ്വി പറഞ്ഞു. ഇന്ത്യന്‍ ശിക്ഷാ നിയമത്തിലെ 147, 148, 149, 332 തുടങ്ങിയ വകുപ്പുകള്‍ പ്രകാരമാണ് 68 ഓളം പേര്‍ക്കെതിരെ കേസെടുത്തത്.
