കൊല്ക്കത്ത: പശ്ചിമ ബംഗാളില് മമതയെ വീണ്ടും വെട്ടിലാക്കി ടിഎംസി എംപിമാരുടെ കൂറുമാറ്റം. ബംഗാളില് നിന്നുള്ള മൂന്ന് മുന് രാജ്യസഭാ എംപിമാര് ബിജെപിയില് ചേര്ന്നു. സുഖേന്ദു ശേഖര് റേ, സുസ്മിത ദേവ്, പ്രകാശ് ചിക് ബറൈക് എന്നിവരാണ് ബിജെപിയില് ചേര്ന്നത്. വരാനിരിക്കുന്ന രാജ്യസഭാ ഉപതെരഞ്ഞെടുപ്പില് ഇവര് തന്നെ സ്ഥാനാര്ത്ഥികളാകുമെന്ന് ബിജെപി ഔദ്യോഗികമായി പ്രഖ്യാപിച്ചു. പാര്ട്ടി അംഗത്വമെടുത്ത് മണിക്കൂറുകള്ക്കകമാണ് പ്രഖ്യാപനം. ബിജെപി ദേശീയ-സംസ്ഥാന നേതാക്കളുടെ സാന്നിധ്യത്തില് കൊല്ക്കത്തയില് നടന്ന ചടങ്ങിലായിരുന്നു മുന് ടിഎംസി നേതാക്കളുടെ പാര്ട്ടി പ്രവേശനം.
കഴിഞ്ഞ മാസമാണ് മൂവരും എംപി സ്ഥാനം രാജിവെച്ചത്. മുന് കോണ്ഗ്രസ് നേതാവും അസമിലെ സില്ച്ചാര് നിയോജകമണ്ഡലത്തില് നിന്നുള്ള മുന് ലോക്സഭാ എംപിയുമായ സുസ്മിത ദേവ് 2021ലാണ് തൃണമൂലില് ചേര്ന്നത്. വടക്കന് ബംഗാളില് നിന്നുള്ള ഒരു ആദിവാസി നേതാവാണ് പ്രകാശ് ചിക് ബറൈക്. ഈ മേഖലയിലെ പട്ടികവര്ഗ സമൂഹങ്ങള്ക്കിടയില് വലിയ സ്വാധീനമുള്ള നേതാവ് കൂടിയാണ് ബറൈക്. മുതിര്ന്ന രാഷ്ട്രീയപ്രവര്ത്തകനായ റേ അഭിഭാഷകന് കൂടിയാണ്. ഈ മൂന്ന് പേരും കൂടി രാജ്യസഭയിലേക്ക് തെരഞ്ഞെടുക്കപ്പെട്ടാല് സഭയിലെ അംഗങ്ങളുടെ എണ്ണം 245 ആകും. ബിജെപിയുടെ അംഗസംഖ്യ 117 ആയും എന്ഡിഎയുടെ അംഗസംഖ്യ 154 ആയും ഉയരും. സഭയില് ഭൂരിപക്ഷം നേടാന് ബിജെപിക്ക് ആകെ വേണ്ടത് 123 സീറ്റുകളാണ്.
