തിരുവനന്തപുരം: തമിഴ്നാട്ടില് നിന്നെത്തിയ തൊഴിലാളികളെ നിരീക്ഷണത്തില് പാര്പ്പിക്കാതെ ജോലിയില് പ്രവേശിപ്പിച്ചതിന് തിരുവനന്തപുരം രാമചന്ദ്രന് ടെക്സ്റ്റൈല്സിനെതിരെ പോലീസ് കേസെടുത്തു. വെള്ളിയാഴ്ച രാവിലെയാണ് തമിഴ്നാട്ടിലെ റെഡ് സോണ് ഉള്പ്പെടെയുള്ള ഇടങ്ങളില് നിന്നുള്ള 29 തൊഴിലാളികള് പഴവങ്ങാടിയിലെ രാമചന്ദ്രന് ടെക്സ്റ്റൈല്സില് ജോലിക്കെത്തിയത്. നിരവധി ആളുകളെത്തുന്ന കടയില് ജോലി ചെയ്ത ശേഷം വെള്ളിയാഴ്ച രാത്രി ഹോസ്റ്റലിലേക്ക് ലഗേജുമായി പോകുമ്പോഴാണ് ഇക്കാര്യം സമീപവാസികളുടെ ശ്രദ്ധയില് പെട്ടത്. തുടര്ന്ന് ഇവര് പോലീസില് വിവരം അറിയിക്കുകയായിരുന്നു.
