തിരുവനന്തപുരം: ഒന്നാം പിണറായി സര്ക്കാരിന്റെ കാലത്ത് സംസ്ഥാനത്ത് 108 ആംബുലന്സ് ഓപ്പറേറ്റ് ചെയ്യാനുള്ള പദ്ധതിയില് 250 കോടിയില് പരം കോടി രൂപയുടെ കമ്മിഷന് തട്ടിപ്പ് നടന്നതായി കോണ്ഗ്രസ് വര്ക്കിങ് കമ്മിറ്റി അംഗം രമേശ് ചെന്നിത്തല ആരോപിച്ചു. 2019-24 കാലഘട്ടത്തില് കാബിനറ്റിന്റെ പ്രത്യേക അനുമതിയോടെ 517 കോടി രൂപയ്ക്കാണ് 315 ആംബുലന്സുകളുടെ നടത്തിപ്പ് അഞ്ചു വര്ഷത്തേക്ക് സെക്കന്തരാബാദ് ആസ്ഥാനമായ ബഹുരാഷ്ട്ര കമ്പനിക്കു നല്കിയത്. പിന്നീട് ഒരു ആംബുലൻസ് കൂടി ചേർത്തു 316 ആക്കി.
ഇത്തവണ 2025-30 കാലഘട്ടത്തിലേക്ക് 335 ആംബുലന്സുകളുടെ നടത്തിപ്പിന് ഇതേ കമ്പനി ടെന്ഡര് ചെയ്തിരിക്കുന്നത് 293 കോടി രൂപ മാത്രം. ചിലവ് വര്ധിച്ചിട്ടും കഴിഞ്ഞ തവണത്തേതിന്റെ പാതി തുകയില് കൂടുതല് ആംബുലന്സുകള് ഓടിക്കാന് കമ്പനിക്കു കഴിയുമെങ്കില് 2019 ലെ പ്രത്യേക കാബിനറ്റ് അനുമതിയുടെ കമ്മിഷന് ഗുണഭോക്താക്കള് ആരൊക്കെയെന്ന് വ്യക്തമാക്കണം. മുഖ്യമന്ത്രിക്കും അന്നത്തെ ആരോഗ്യ മന്ത്രിക്കും ഈ ഇടപാടില് പങ്കുണ്ട്. – ഇതുസംബന്ധിച്ച രേഖകള് പുറത്തു വിട്ട് രമേശ് ചെന്നിത്തല പറഞ്ഞു.
