റാന്നി: തോടുകളുടെ പുനരുദ്ധാരണത്തിനായി ”ഇനി ഞാനൊഴുകട്ടെ” പദ്ധതിയുമായി
റാന്നി ഗ്രാമ പഞ്ചായത്ത്. പദ്ധതി പ്രകാരം ഉതിമൂട് – വലിയ കലുങ്ക് – കാളപ്പാലം വലിയതോട് പുനരുദ്ധാരണ പ്രവർത്തനത്തിന് തുടക്കമായി. മഴക്കാലത്ത് അക്വഡേറ്റ് ഭാഗത്ത് വെള്ളം കെട്ടികിടക്കുന്നതിനാൽ റോഡിൽ കൂടിയാണ് വെള്ളം ഒഴുകിയിരുന്നത്. മഹാത്മാ ദേശീയ ഗ്രാമീണ തൊഴിലുറപ്പ് പദ്ധതിയിൽ നാല്പത് തൊഴിലാളികൾ ചേർന്ന് 626 തൊഴിൽ ദിനങ്ങൾ സൃഷ്ടിച്ചാണ് പ്രസ്തുത തോട് നവീകരിക്കുന്നത്. 4 ,5 ,9, 10, 11 വാർഡുകളിലൂടെ കടന്ന് പോകുന്ന വലിയ തോടിന് എസ്റ്റിമേറ്റ് തുക രണ്ട് ലക്ഷത്തി മുപ്പതിനായിരം രൂപയാണ്.
മഴക്കാല പൂർവ്വ ശുചീകരണത്തിന്റെ ഭാഗമായി ജൂൺ ആദ്യവാരം പണികൾ പൂർത്തികരിക്കുമെന്ന് മേട്രൺ സുരേഖ സജി അറിയിച്ചു. റാന്നി പഞ്ചായത്ത് അക്രഡിറ്റഡ് എഞ്ചിനീയർ ലതാകുമാരി, ഓവർസീയർ ഷിൻ്റു മനോജ്, വൈസ് പ്രസിഡന്റ് ടി ജെ ബാബുരാജ്, വാർഡ് മെമ്പറന്മാരായ ദിലീപ് ഫിലിപ്പ്, എ എൻ സോമൻ എന്നിവർ നേതൃത്വം നൽകുന്നു.
