റാന്നി : റാന്നി നോളജ് വില്ലേജ് വിദ്യാഭ്യാസ മാർഗരേഖയുടെയും ഇ-ബുക്ക് ആവിഷ്കാറിന്റേയും പ്രകാശനം തിങ്കളാഴ്ച പകൽ 2.30ന് വിദ്യാഭ്യാസമന്ത്രി വി ശിവൻകുട്ടി നിര്വഹിക്കുമെന്ന് അഡ്വ പ്രമോദ് നാരായൺ എംഎൽഎ പറഞ്ഞു. ചീഫ് വിപ്പ് ഡോ എൻ ജയരാജ് വിദ്യാഭ്യാസ മാർഗരേഖ സ്വീകരിക്കും. നോളജ് വില്ലേജ് കോഡിനേറ്റർ രാജേഷ് എസ് വള്ളിക്കോട് മാർഗ്ഗരേഖ അവതരണവും എസ് ഐ ഇ ടി ഡയറക്ടർ ബി അബുരാജ് മാർഗ്ഗരേഖ അവലോകനവും നടത്തും. യോഗത്തിൽ അഡ്വ പ്രമോദ് നാരായൺ എംഎൽഎ അധ്യക്ഷത വഹിക്കും.
അങ്കണവാടി മുതൽ ഉന്നത വിദ്യാഭ്യാസ രംഗം വരെയുള്ള വിദ്യാഭ്യാസ പ്രവർത്തനങ്ങൾക്ക് പുതിയ ദിശയും ലക്ഷ്യവും നൽകാൻ നോളജ് വില്ലേജ് പ്രവർത്തനങ്ങൾ വഴി കഴിഞ്ഞിട്ടുണ്ട്. ഇതിൻറെ ഭാഗമായുള്ള ഇന്നവേഷൻ ഹബ് ഉൾപ്പെടെയുള്ള സ്കിൽ പാർക്ക് ആരംഭിക്കാൻ സംസ്ഥാന സർക്കാർ 10 കോടി രൂപ ബജറ്റിൽ വകയിരുത്തിയിട്ടുണ്ടെന്ന് എംഎൽഎ പറഞ്ഞു. റാന്നി നിയോജക മണ്ഡലത്തിലെ എല്ലാ വിദ്യാലയങ്ങളുടെ പ്രാധിനിത്യം ഉറപ്പാക്കിക്കൊണ്ട് കുട്ടികളുടെ സർഗാത്മക ആവിഷ്കാരങ്ങളും സാമൂഹ്യ ഇടപെടലുകളും രേഖപ്പെടുത്തുന്ന ഇ- ബുക്ക് ആവിഷ്ക്കാർ കേരളത്തിലെ തന്നെ ആദ്യ ഉദ്യമം ആണെന്ന് അദ്ദേഹം പറഞ്ഞു.
