റാന്നി : റാന്നി താലൂക്ക് ആശുപത്രിക്ക് ലഭിച്ച ഓക്സിജൻ പ്ലാന്റിന്റെ ഉദ്ഘാടനം 27ന് പകൽ 10.30 ന് ആരോഗ്യ വകുപ്പ് മന്ത്രി വീണാ ജോർജ് നിർവഹിക്കുമെന്ന് അഡ്വ പ്രമോദ് നാരായൺ എംഎൽഎ അറിയിച്ചു. ബാംഗ്ലൂർ ആസ്ഥാനമാക്കി പ്രവർത്തിക്കുന്ന ഡോക്ടേഴ്സ് ഫോർ യു എന്ന സംഘടനയാണ് എംഎൽഎയുടെ അഭ്യർത്ഥന പ്രകാരം ഒന്നര കോടി രൂപയിലധികം ചിലവഴിച്ച് റാന്നി താലൂക്ക് ആശുപത്രിക്ക് ഓക്സിജൻ പ്ലാൻറ് നിർമ്മിച്ച് നൽകിയത്.
ഓക്സിജൻ പ്ലാൻറ് സ്ഥാപിക്കുന്നതിന് അടിസ്ഥാന സൗകര്യങ്ങൾ ഒരുക്കുന്നതിനായി റാന്നി ബ്ലോക്ക് പഞ്ചായത്ത് 12 ലക്ഷം രൂപയും ചിലവഴിച്ചിട്ടുണ്ട്. കോവിഡ് രോഗ ബാധ രൂക്ഷമായ സാഹചര്യത്തിൽ രോഗം ഗുരുതരമായ വർക്ക് ശ്വാസോച്ഛ്വാസം സുഗമമാക്കുന്നതിന് നൽകുന്ന ഓക്സിജന് ക്ഷാമമുണ്ടായതിനെ തുടര്ന്നാണ് സഹായമെത്തിയത്.
മലയോരമേഖലയിലെ പ്രധാന ചികിത്സാ കേന്ദ്രമായ റാന്നി താലൂക്ക് ആശുപത്രിയിൽ ഓക്സിജൻ ക്ഷാമം ഉണ്ടാകാതിരിക്കാൻ ഒരു ഓക്സിജൻ പ്ലാൻറ് നൽകി സഹായിക്കണമെന്ന് എംഎൽഎ സംഘടനയോട് അഭ്യർത്ഥിക്കുകയായിരുന്നു. ഇതാണ് ഇപ്പോൾ നിർമ്മാണം പൂർത്തിയായത്. യോഗത്തിൽ അഡ്വ പ്രമോദ് നാരായൺ എംഎൽഎ അധ്യക്ഷനാകും.
