റാന്നി : പാറമടയിൽ നിന്ന് കല്ല് കയറ്റി പോവുകയായിരുന്ന ടിപ്പർ ലോറി മറിഞ്ഞ് ക്ലീനർ മരിച്ചു. അമ്പലപ്പുഴ കരൂർ മായാ സദനത്തിൽ മഹേഷ് (33)ആണ് മരിച്ചത്. അപകടത്തിൽ ഡ്രൈവർ കരൂർ പുത്തൻചിറയിൽ ഉണ്ണി (28)യെ പരിക്കുകളോടെ റാന്നി താലുക്ക് ആശുപത്രിയിൽ പ്രവേശിപ്പിച്ചു. അത്തിക്കയം -ചെമ്പനോലി-വെച്ചൂച്ചിറ റോഡിൽ കോട്ടായിപ്പടി വളവിൽ ഇന്ന് ഉച്ചകഴിഞ്ഞായിരുന്നു അപകടം.
ചെമ്പൻമുടി പാറമടയിൽ നിന്ന് കരിങ്കല്ല് ലോഡുമായെത്തിയ ടിപ്പർ കോട്ടായിപ്പടി വളവിൽ വെച്ച് നിയന്ത്രണംവിട്ട് താഴേക്ക് മറിയുകയായിരുന്നു. ശബ്ദം കേട്ട് ഓടിയെത്തിയ നാട്ടുകാർ ഇരുവരേയും താലൂക്ക് ആശുപത്രിയിലെത്തിച്ചെങ്കിലും ക്ലീനർ മരിച്ചു. സ്ഥിരം അപകടമേഖലയായ ഇവിടെ പാറമടകളിൽ നിന്നും ക്രഷറുകളിൽ നിന്നും എത്തുന്ന വാഹനങ്ങൾ നിയന്ത്രണം വിട്ടു മറിയാറുണ്ട്. റോഡിന്റെ കുത്തനെയുള്ള ഇറക്കവും വളവും കാരണം ഭാരം കയറ്റി വരുന്ന വാഹനങ്ങൾക്ക് നിയന്ത്രണം നഷ്ടമാകുന്നതാണ് പലപ്പോഴും അപകടങ്ങൾക്കിടയാകുന്നത്.
