മലപ്പുറം : മാനസിക വെല്ലു വിളി നേരിടുന്ന പെണ്കുട്ടിയെ പീഡിപ്പിച്ച പ്രതി അറസ്റ്റില്. പുറത്തു പറഞ്ഞാല് കൊല്ലുമെന്ന് ഭീഷണി. അരീക്കോട് കാവനൂരില് തളര്ന്നു കിടക്കുന്ന അമ്മയുടെ തൊട്ടടുത്തുവെച്ച് പീഡനത്തിന് ഇരയായ മാനസിക വെല്ലുവിളി നേരിടുന്ന പെണ്കുട്ടിക്ക് നേരെ വധഭീഷണിയും. നിലവില് പോലീസ് അറസ്റ്റു ചെയ്ത പ്രതി മുട്ടാളന് ഷിഹാബ് എന്നറിയപ്പെടുന്ന ടി.വി ഷിഹാബ് ജയിലില് നിന്ന് ജാമ്യം നേടി പുറത്തിറങ്ങിയാല് ജീവനു ഭീഷണിയാണന്ന ആശങ്കയിലാണ് യുവതിക്കൊപ്പം പീഡനക്കേസില് സാക്ഷി നില്ക്കുന്നവരും. ഗുരുതര ആരോഗ്യ പ്രശ്നങ്ങള് ബാധിച്ച് തളര്ന്നു കിടക്കുന്ന അമ്മയുടെ ഏക ആശ്രയം ഈ മകളാണ്. പ്രാഥമിക കൃത്യങ്ങള്ക്കു പോലും കട്ടിലില് നിന്ന് ഇറങ്ങാന് കഴിയാത്ത അമ്മയെ പരിചരിക്കുന്ന മാനസിക, ശാരീരിക വെല്ലുവിളികള് നേരിടുന്ന മകളെ കഴിഞ്ഞ ദിവസം അര്ധരാത്രി എത്തിയാണ് പ്രതി ക്രൂരമായ പീഡനത്തിന് ഇരയാക്കിയത്.
വാടക ക്വാര്ട്ടേഴ്സിന്റെ കതക് ചവിട്ടി പൊളിച്ചാണ് അകത്തു കടന്നത്. തൊട്ടടുത്ത് വച്ച് മകളെ പീഡിപ്പിക്കുന്നത് അറിഞ്ഞിട്ടും തളര്ന്നു കിടക്കുന്ന അമ്മയ്ക്ക് നിസഹായയായി കരയാനേ കഴിയുമായിരുന്നുളളു. പുറത്തു പറഞ്ഞാല് യുവതിയെ കൊന്നു കളയുമെന്ന് പ്രതി ഭീഷണിപ്പെടുത്തി. അയല്ക്കാര് അറിയിച്ചതിനെ തുടര്ന്നാണ് പോലീസെത്തി പ്രതിയെ അറസ്റ്റ് ചെയ്തത്. ഇതേ യുവതിയെ മൂന്നു മാസം മുന്പും പീഡനത്തിന് ഇരയാക്കിയെങ്കിലും ഭയപ്പാടുമൂലം പുറത്തു പറഞ്ഞിരുന്നില്ല. പ്രതി ഷിഹാബിനെതിരെ ഒട്ടേറെ കേസുകള് വേറേയുമുണ്ട്. പോലീസ് കസ്റ്റഡിയില് എടുത്തതിനു പിന്നാലെ പരാതി അറിയിച്ച അയല്ക്കാരിയുടെ ഭര്ത്താവിനെ ഫോണില് വിളിച്ച് സാക്ഷി പറഞ്ഞാല് കൊലപ്പെടുത്തുമെന്ന് ഭീഷണിപ്പെടുത്തി.
