കാക്കനാട്: യുവതിയെ ബലാത്സംഗം ചെയ്ത് ഗര്ഭിണിയാക്കിയ സംഭവത്തില് തൃശൂര് സ്വദേശി അറസ്റ്റില്. വാടാനപ്പള്ളി എച്ച്.എസ് റോഡില് ഷഫീഖാണ് (43) തൃക്കാക്കര പോലീസിന്റെ പിടിയിലായത്. തൃശൂര് സ്വദേശിനിയുടെ പരാതിയിലാണ് നടപടി. കാക്കനാട്ട് ഇയാള് നടത്തിയിരുന്ന ഹോട്ടലില് അടുക്കള ജോലി ചെയ്യുന്നതിന് കൊണ്ടുവന്ന യുവതിയാണ് പരാതിയുമായി പൊലീസിനെ സമീപിച്ചത്.തേവക്കല് ഭാഗത്ത് ഇവര്ക്ക് താമസ സൗകര്യം ഒരുക്കി ഇവിടെ പീഡിപ്പിക്കുകയായിരുന്നു. യുവതി ഗര്ഭിണിയായ വിവരമറിഞ്ഞ ഷഫീഖ് ഇവരെ സംരക്ഷിക്കാമെന്ന് ഉറപ്പുനല്കിയെങ്കിലും പിന്നീട് തിരിഞ്ഞുനോക്കാതെ വന്നതോടെ യുവതി വാടാനപ്പിള്ളി പോലീസിലും പിന്നീട് തൃക്കാക്കര പോലീസിലും പരാതിയുമായി എത്തുകയായിരുന്നു.
സൈബര് സെല്ലിന്റെ സഹായത്തോടെ ഫോണ് നമ്പര് കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ കണ്ടെത്തിയത്. കോയമ്പത്തൂരില് സൂപ്പര്മാര്ക്കറ്റ് നടത്തുകയായിരുന്ന ഷഫീഖിനെ തൃക്കാക്കര സി.ഐ ആര്. ഷാബുവിന്റെ നേതൃത്വത്തില് എസ്.ഐമാരായ എന്.ഐ. റഫീഖ്, റോയ് കെ. പുന്നൂസ്, എ.എസ്.ഐ ഗിരീഷ് കുമാര്, സി.പി.ഒ ജാബിര്, രഞ്ജിത് എന്നിവരടങ്ങിയ അന്വേഷണസംഘമാണ് പിടികൂടിയത്.
