തിരുവനന്തപുരം : കുട്ടികളിലെ വായനാശീലം ലക്ഷ്യം വച്ച് പത്രവായനയ്ക്കും പുസ്തകവായനയ്ക്കുമായി സ്കൂളുകളിൽ പ്രത്യേകം പീരിയഡ് ഏർപ്പെടുത്തുമെന്ന് വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. വിദ്യാർത്ഥികളിൽ വായന പ്രോത്സാഹിപ്പിക്കുന്നതിനായി പ്രമുഖപത്രങ്ങളിലെ പത്രാധിപർ – മാധ്യമ പ്രവർത്തകർ എന്നിവരുമായുള്ള കൂടിക്കാഴ്ചയിലാണ് മന്ത്രി ഈ തീരുമാനം അറിയിച്ചത്. ദിവസവും കുട്ടികൾ പത്രം വായിക്കുന്നുണ്ടോ എന്ന് ഉറപ്പാക്കൽ, പ്രധാന വാർത്തകൾ കേന്ദ്രീകരിച്ചുള്ള ചർച്ചകൾ, കുറിപ്പുകൾ തയ്യാറാക്കൽ, വായന പ്രോത്സാഹിപ്പിക്കുന്നതിൽ അദ്ധ്യാപകരുടെയും രക്ഷിതാക്കളുടെയും ഇടപെടലുകൾ, പത്രവായനയ്ക്ക് ഗ്രേസ് മാർക്ക് തുടങ്ങിയ നിർദ്ദേശങ്ങളും യോഗത്തിലുയർന്നു.
ഗ്രേസ് മാർക്ക് ഉൾപ്പെടുത്തുന്ന കാര്യം പരിഗണിക്കുമെന്ന് മന്ത്രി പറഞ്ഞു. വിദ്യാർത്ഥികളിൽ പത്രവായന ശക്തിപ്പെടുത്താനായി സ്കൂൾതലത്തിൽ വായനോത്സവം സംഘടിപ്പിക്കും. വായന പ്രോത്സാഹിപ്പിക്കുന്നതിന് അദ്ധ്യാപകരുടെയും രക്ഷിതാക്കളുടെയും പങ്ക് ഉറപ്പാക്കാൻ അവർക്കായി വകുപ്പ് പുറത്തിറക്കുന്ന കൈപ്പുസ്തകങ്ങളിൽ നിർദ്ദേശങ്ങൾ ചേർക്കും. യോഗം സംബന്ധിച്ച് ഒരാഴ്ചയ്ക്കകം കരട് തയ്യാറാക്കാൻ എസ്.സി.ഇ.ആർ.ടി ഡയറക്ടർക്ക് മന്ത്രി നിർദ്ദേശം നൽകുകയും ചെയ്തു.
