ഡല്ഹി: ഇന്ത്യയില് കോവിഡ് വര്ധനക്ക് കാരണം പുതിയ വകഭേദം. രാജ്യത്ത് കോവിഡ് വര്ധനക്ക് കാരണമായെന്ന് കരുതുന്ന കോവിഡ് എക്സ്.ബി.ബി 1.16 വകഭേദത്തിന്റെ 349 സാമ്പിളുകള് കണ്ടെത്തി. ഒമ്പത് സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമാണ് ഇത്രയും സാമ്പിളുകള് കണ്ടെത്തിയത്. ജനുവരിയില് രണ്ട് സാമ്പിളുകള് പരിശോധിച്ചപ്പോഴാണ് എക്സ്.ബി.ബി 1.16 ആദ്യമായി കണ്ടെത്തിയത്. അതേസമയം രാജ്യത്തെ കോവിഡ് കേസുകളില് വീണ്ടും വര്ധനവ്. തുടര്ച്ചയായ എട്ടാം ദിവസവും കോവിഡ് ബാധിതര് ആയിരത്തിന് മുകളിലാണ്.
പുതുതായി 1300 പേര്ക്കാണ് കോവിഡ് സ്ഥിരീകരിച്ചു. 140 ദിവസത്തിനിടെ ഏറ്റവും ഉയര്ന്ന കണക്കാണിത്. 1.46 ശതമാനമാണ് ടെസ്റ്റ് പോസിറ്റിവിറ്റി നിരക്ക്. 24 മണിക്കൂറിനിടെ മൂന്ന് പേര് കോവിഡ് ബാധിച്ച് മരിച്ചു. മരണനിരക്ക് 1.19 ശതമാനമാണെന്നും സര്ക്കാര് കണക്കുകള് വ്യക്തമാക്കുന്നു. രാജ്യത്ത് കോവിഡ് കേസുകളില് വര്ധന രേഖപ്പെടുത്തുന്ന സാഹചര്യത്തില് മുന്കരുതലും ജാഗ്രത നിര്ദ്ദേശങ്ങളും പാലിക്കാന് ജനങ്ങളോട് പ്രധാനമന്ത്രി ഇന്നലെ നിര്ദ്ദേശിച്ചിരുന്നു.
