കലഞ്ഞൂര് : കെ.എ.പി കനാല് കടന്നുപോകുന്ന കലഞ്ഞൂരില് സബ് കനാലിന് മുകളില് യുവാക്കളുടെ റീല്സ് ചിത്രീകരണം അപകടക്കെണിയായി മാറുന്നു. സമൂഹ മാധ്യമങ്ങളില് പോസ്റ്റ് ചെയ്യുന്നതിനായാണ് ഇത്തരത്തില് യുവാക്കള് റീലുകള് ചിത്രീകരിക്കുന്നത്. വളരെ വലിയ ഉയരത്തില് കൂടി കടന്നു പോകുന്ന സബ് കനാലിലെ വെള്ളത്തില് കുളിക്കുവാനും വീഡിയോ ദൃശ്യങ്ങള് പകര്ത്തുവാനുമായി എത്തുന്ന യുവാക്കള് വലിയ അപകടങ്ങളാണ് വരുത്തി വെക്കുന്നത്. കഴിഞ്ഞ ദിവസമാണ് ഇത്തരത്തില് കലഞ്ഞൂര് സബ് കനാലിന് മുകളില് നിന്നും ഒരാള് വീണ് മരിച്ചത്. കഴിഞ്ഞ കുറച്ചു കാലങ്ങളായി ഇത്തരം സംഭവങ്ങള് കലഞ്ഞൂരില് നടക്കുന്നുണ്ട് എങ്കിലും പോലീസോ കല്ലട ഇറിഗേഷന് അധികാരികളോ വിഷയത്തില് ബന്ധപ്പെട്ടിരുന്നില്ല.
പ്രദേശവാസികളായ ആളുകള് മാത്രമാണ് ഇത്തരത്തില് കനാലിന് മുകളില് കയറുന്ന യുവാക്കളെ തടയുകയും മുന്നറിയിപ്പ് നല്കുകയും ചെയ്തിട്ടുള്ളത്. കലഞ്ഞൂര് കുറ്റിമണ് പ്രദേശത്തെ സബ് കനാലില് ആണ് യുവാക്കള് കൂടുതലും ഇറങ്ങുന്നത്. ഇതില് മദ്യപിച്ച് ഇറങ്ങുന്നവര് ഉള്പ്പെടെയുണ്ട്. രാത്രിയിലും ഇത്തരം സംഭവങ്ങള് ആവര്ത്തിക്കുന്നുണ്ട്. പലപ്പോഴും ഇത്തരത്തിലുള്ള കനാലുകളുടെ അടുത്ത് ജനവാസം കുറവായതിനാല് ആരെങ്കിലും അപകടത്തില്പ്പെട്ടാല് പോലും മണിക്കൂറുകള് കഴിഞ്ഞായിരിക്കും പുറംലോകം അറിയുക.
യുവാക്കളെ താക്കീത് ചെയ്താലും ഇവര് വീണ്ടും വരുന്നുണ്ടെന്ന് നാട്ടുകാര് പറയുന്നു. സബ് കനാലിന് മുകളില് കൂടി അപകടകരമായ രീതിയില് നടക്കുകയും ആര്ത്ത് വിളിക്കുകയും ചെയ്യുന്ന യുവാക്കള് സ്ഥലവാസികള്ക്കും ബുദ്ധിമുട്ട് സൃഷ്ടിക്കാറുണ്ട്. ഇത്തരക്കാര്ക്ക് എതിരെ കര്ശന നടപടി സ്വീകരിച്ചില്ലെങ്കില് നിരവധി ജീവനുകള് ഇനിയും അപകടത്തില്പ്പെടും എന്നത് ഉറപ്പാണ്.
