ആലത്തൂര് : സിപിഎം നേതാക്കള് രമ്യ ഹരിദാസ് എം.പിയെ തടഞ്ഞുനിര്ത്തി ഭീഷണിപ്പെടുത്തിയ സംഭവത്തില് ഇന്ന് കൂടുതല് പേര്ക്കെതിരെ കേസ് എടുക്കും. പാലക്കാട് ആലത്തൂരില് ഇന്നലെ ഉച്ചയോടെയാണ് കേസിന് ആസ്പദമായ സംഭവം നടന്നത്. രമ്യ ഹരിദാസ് പറയുന്നത് ആലത്തൂരില് കാലു കുത്തിയാല് കാലു വെട്ടുമെന്ന് ഭീഷണിപ്പെടുത്തിയെന്നാണ്.
ആലത്തൂര് പഞ്ചായത്ത് മുന് പ്രസിഡന്റ് നാസര്, നജീബ് എന്നിവര്ക്കെതിരെയും കണ്ടാലറിയാവുന്ന ഏഴ് പേര്ക്കെതിരെയുമാണ് പരാതി. ഇതിനകം പ്രതിപക്ഷ നേതാവ് ഉള്പ്പെടെയുള്ളവര് രമ്യ ഹരിദാസിന് പിന്തുണയുമായി എത്തിയിട്ടുണ്ട്. അതേസമയം സിപിഎം നേതാക്കളും പരാതി നല്കിയിട്ടുണ്ട്. എംപിക്ക് ഒപ്പം ഉണ്ടായിരുന്ന കോണ്ഗ്രസ് നേതാവ് പാളയം പ്രദീപ് ഭീഷണിപ്പെടുത്തി എന്നാണ് പരാതി. ആലത്തൂര് പോലീസ് ഈ പരാതിയില് പ്രദീപിനെതിരെ കേസെടുത്തിട്ടുണ്ട്.
